Measta guokte milliárdda geavaheaddji galget dál árvvoštallát iešguđet ođasmediaid luohttevašvuođa.
Measta guokte milliárdda geavaheaddji galget dál árvvoštallát iešguđet ođasmediaid luohttevašvuođa.
Doaibma maid sosiála media Facebook dál álggaha lea oassin sin rahčamušas behtolaš ođđasiid vuostá.
Vuođđudeaddji ja Facebooka alimus hoavda Mark Zuckerberg čállá iežas Facebook siiddus ahte háliidit vuoruhit ođasáššiid mat leat luohttehahttii. Son lohká maid ahte báikkálaš ja diehtojuohkin sisdoallu vuoruhuvvo.
– Lea beare olu sensašuvdna ođđasat ja behtolaš ođđasat máilmmis. Sosiála mediat dagahit ahte dieđut juhkkojuvvot jođáneappo go goassege ovdal, ja jus eat dan hehtte, de mii dušše gievrudit dáid, čállá hoavda.
Álget
Boahtte vahkku álget sirremiin. Facebook lea veardidan olu vugiid movt sirret, ja fuomášedje ahte buot buoremus ja objektiivvalaš lea jearrat geavaheddjiin.
– Mii livččiimet sáhttit ieža dan mearridit, muhto ii orron vuogas. Mii veardideimmet jearrat ekspearttain, muhto ii livčče dat ge objektiivvalaš, lohká Zuckerberg.
Moaitán
Sihke Facebook ja eará stuora neahttafitnodagat go Google ja Twitter leat ožžon moaitámušaid go leat veahkkin behtolaš ođđasiid juohkimis. Erenoamážit maŋŋil Amerika 2016 presideanttaválggaid.
Ođđa sirrenvuogádat lea okta olu plánejuvvon rievdadusain Facebookas. Mannán vahkku almmuhedje ahte boahtá ođđa rievdadus, namalassii ahte olbmáid ja bearraša čállosat vuoruhuvvet.
(©NTB)
