Givssidanáittardeaddji galgá nannet barggu mii eastada givssideami mánáidgárddiin ja skuvllain.
Givssidanáittardeaddji galgá nannet barggu mii eastada givssideami mánáidgárddiin ja skuvllain.
Boahtte čavčča rájes galgá buot Norgga fylkkain givssidanáittardeaddji, lea ráđđehus mearridan.
– Ii okta ge mánná galgga givssiduvvot ja sis galgá oadjebas biras mánáidgárddis ja skuvllas, dat lea sin vuoigatvuohta. Mánát ja nuorat geat gillájit givssideami ja sin bearrašat galget oažžut veahki jođánit fylkka givssidanáittardeaddjis. Lean hui ilus go ráđđehus ja min ovttasbargobellodagat Risttalaš álbmotbellodat ja Gurutbellodat oažžut dán doaimma johtui, dadjá máhttoministtar Torbjørn Røe Isaksen preassadieđáhusas.
Našunála ortnet, báikkálaš čovdosat
Dál leat jo viđa fylkkas sierra givssidanáittardeaddjit, ja eiseválddit leat ge mearridan viiddidit dán doaimma buot Norgga fylkkaide.
Fylkkagielddat ja stáhta ruhtadit doaimma.
– Givssidanáittardeaddji lea našunála ortnet, muhto seammás besset báikkálaččat heivehit doaimma, čilge Røe Isaksen.
Bargu álgá mánáidgárddis
Ođđa ortnet galgá sihkkarastit ahte givssidanáittardeaddji beassá čađahit barggus beroškeahttá geat eaiggáduššet mánáidgárddiid ja skuvllaid.
Givssidanáittardeaddji galgá maid ovttasbargá dálá ohppiid- ja oahpahalliid givssidanáittardeddjiin joatkkaskuvllain.
– Givssideapmi lea duođalaš servodatváttisvuohta ja lea bahča vásáhus mánáide geat givssiduvvojit. Danin lea dehálaš ahte eastadanbargu álgá mánáidgárdedásis jo, dadjá máhttoministtar.
