-Almmuhus-
OĐĐASATOđđa buohcceviessu gárvána njukčamánus

Ođđa buohcceviessu gárvána njukčamánus

-

-

Boahtte jagi njukčamánu 1. beaivvi galgá Girkonjárgga ođđa buohcceviessu leat doaimmas, dieđiha Finnmárkku Buohcceviessu preassadieđáhusastis.

Dál lea viimmat čielgan goas Girkonjárgga ođđa buohcceviessu gárvána ja goas dat váldojuvvo atnui.

– Ođđa buohcceviessu galgá leat doaimmas njukčamánu 1. beaivvi boahtte jagi, čállá Finnmárkku Buohcceviessu preassadieđáhusas.

 

Bargit fárrejit árabut

Bargit, geat eai divššo buhcciid, fárregohtet ođđa buohccevissui jo juovlamánu 1. beaivvi.

Dat guoská medisiidnateknihkalaš rusttetbargiide, IKT-bargiide, teknihkalaš doaibmabargiide, bassiide, gievkkanbargiide ja doaibma- ja opmodatguovddáža kánturbargiide.

Vahkku 50 rájes oažžugohtet bargit oahpu rusttegiin mat galget geavahuvvot ođđa buohcceviesus.

 

Rahpanváikkuhusat

Finnmárkku Buohcceviessu dáhkida ahte buot pasieanttat ožžot plánejuvvon divššu.

Go ođđa buohcceviesu rahpan lahkona, de leat unnit doaibmannávccat ja danin fertejit muhtin pasieanttat sáddejuvvot Hámmárfeastta buohccevissui dahje UNN buohccevissui Romsii.

-Almmuhus-