-Almmuhus-
-Almmuhus-
-Almmuhus-
OĐĐASATEanemus nuorra dievddut ožžot bissovaš virggiid

Eanemus nuorra dievddut ožžot bissovaš virggiid

-

-

Nuorra dievddut ožžot dávjjimusat bissovaš virggi iežaset vuosttaš bargosajis. Sin searvvis ožžot guovttis golbmasis bissovaš virggi, muhto dušše badjelaš bealli nissoniin leat seamma dilis.

Statistihkalaš guovddášdoaimmahat lea guorahallan 15–34-jahkásaččaid bargoeallima.

67 proseantta nuorra dievdduin ožžot bissovaš virggi iežaset vuosttaš bargosajis gosa álget maŋŋel go leat čađahan oahpu.

Nuorra nissoniin fas ožžot 53 proseantta bissovaš virggi vuosttaš bargoaddis.

– Lea stuora earru gaskal dievdduid ja nissoniid. Jus bidjá buohkaid seamma dillái, de vástidit 60 proseantta ahte ožžo bissovaš barggu iežaset vuosttaš bargosajis gosa álge maŋŋel go ledje gazzan alit oahpu, dadjá Statistihkalaš guovddášdoaimmahaga bargoeallinstatistihka ossodaga seniorráđđeaddi Tor Petter Bø.

 

70 000 barggu ja oahpu haga

Bargoealliniskkadeamis boahtá ovdan ahte sullii 70 000, dahje 7 proseantta 15–29-jahkásaš nuorain leat bargguid haga, eai ge sii leat gazzan makkárge oahpu. Dát lohku bissu oalle stáđisin Norggas.

Guorahallan čájeha maiddái ahte dušše 1 proseantta nuorain álggahit iežaset fitnodagaid, earát ges álget gaskaboddosaš bargguide.

-Almmuhus-