Eanet ja eanet biktasiin leat dál šleđggonat, muhto NAF oaivvilda dat lea njuolgut várálaš. Sii leat iskan biktasiid, ja gávnnahan ahte eai doala dási.
Eanet ja eanet biktasiin leat dál šleđggonat, muhto NAF oaivvilda dat lea njuolgut várálaš. Sii leat iskan biktasiid, ja gávnnahan ahte eai doala dási.
Šleđggonveasta ii soaitte vuosttaš maid olmmoš coggala go rámbuvrii vuolgá váccii. Gávdnojit olu eará vejolašvuođat movt oidno čakčaseavdnjadis.
NAF lea iskan biktasiid maid leat šleđggonat gitta, ja mat leat oaivvilduvvon beaivválaš atnui. Oktiibuot leat iskan 14 biktasa, earret eará čeabetliidni masa šleđggon lea gorrojuvvon gitta.
Sii leat iskan designa-boaluid mat leat gorrojuvvon jáhkaide, ruovttugođđon šleđggongahpira, arvesuoji ja gávppašanseahka. Sii leat maid iskan šleđggonveasttaid.
– Eambbosat geavahit šleđggoniid, ja dat lea buorre. Diehtit ahte mánát ja lášmmohallit leat čeahpit geavahit šleđggoniid, muhto árgabeaivvis leat rávisolbmot láikkit geavahit šleđggona. Mii eat vuordde ahte galgá šleđggonveasta badjelasas go gávpogis vázzá, muhto berrešii leat juoga alde, vai oidno, lohká Morten Fransrud NAF preassadieđáhusas.
Eai doala dási
Dábálaš šleđggonbuktagat nu go veasttat ja báttit fertejit čuovvut CE-dási. Muhto dábálaš biktasat eai dárbbaš dan čuovvut. Dat dagaha váttisvuođa geavaheddjiide, go eai dieđe lea go buktagiin ávki vai ii. Fransrud NAFas oaivvilda ahte lea váttis go biktasiiguin maid máhkaš lea šleđggon, ii doala dási.
– Dákkár biktasat sáhttet addit oadjebasvuođa, mii ii leat duohta. Dan oaidnit min iskkadeamis. Lea njuolgut várálaš geavahit šleđggona mii ii doaimmat barggu. De lea ovtta ládje dájuheame oasti. Jus galgá gohčodit juoga man «šleđggonin», de berrešii doaibmat, lohká Fransrud.
Šleđggončeabetliidni ja šleđggonspraya man geahččaledje eai oidnon seavdnjadasas.
Buoremusat
Tanuma Gávppašanseahkka ja Clas Ohlsona arvesuodji ledje iskkadeami vuoitit. Dát buktagat oidnojit guhkás, ja leat praktihkalaččat go gokčet eanet dárbbuid. Eai leat ge nu divrasat. Vikinggarn Reflex maid hirpmáhuhtti NAF.
Leat dábálaš šleđggonat, báttit ja veasta mat doibmet buoremusat.
