Sámediggeráđđi lea juolludan 250 000 ruvnno giellaguovddáža ásaheapmái.
Sámediggeráđđi lea juolludan 250 000 ruvnno giellaguovddáža ásaheapmái.
Oslo sámi viessu lea ožžon 250 000 ruvnno giellaguovddáža ásaheapmái.
Giellaguovddáš galgá dán čavčča mielde ásahuvvot, ja doarjja man sámediggeráđđi lea juolludan galgá adnot giellakurssaide ja sámegielarenaid ásaheapmái. Dan cealká Sámediggi preassadieđáhusas.
– Sámediggeráđđi lea ilus go ásahuvvo giellaguovddáš oaivegávpogii. Dát lea erenoamáš dehálaš danne go eai leat ásahuvvon sámi giellaguovddážat Lulli-Norggas ja danne go leat unnán eará nanu giellabirrasat Oslo-guovllus, gos orrot olu sápmelaččat, dadjá várrepresideanta Lars Filip Paulsen.
Sávvá lihku
Lea čájehuvvon ahte sámi giellaguovddážiin lea dehálaš rolla sámegielaid ovddideamis. Sámi giellaguovddáš Oslos sáhttá sámegielaid nannet ja ovddidit stuorát guovllus.
– Háliidan sávvat Sámi vissui ja Oslo suohkanii lihku giellaguovddášásahemiin, ja ávžžuhan gávpoga ássiid ja maiddái earáid viššalit searvat doaimmaide maid giellaguovddáš bidjá johtui, dadjá Lars Filip Paulsen.
