Ávvira oaggungilvu lea loahpahuvvon. Buot njeallje vuoitit leat nissonolbmot. Sáivagilvvu vuoiti, gii gottii hirbmat čuovžža, imašta leat go sus magihkalaš fámut. Luossagilvvu vuoiti fas ii láve goassige vuoitit. Loga maid muitalit.
Buohkat, geat gova ledje sádden luossagilvui ja guollelihku gilvui, ledje mielde vuorbádeamis go gilvu loahpahuvvui suoidnemánu 31. beaivvi. Sáivagilvvus fas lei dat stuorámus rávdu ja stuorámus čuovža mii attii vuoitu. Luossagilvvus lea vuosttaš vuoitun skeaŋkakoarta, árvosaš 5000 ruvnno, man sáhttá geavahit Sport 1:s, ja guollelihku gilvvus fas 1500 ruvnno árvosaš skeaŋkakoarta Sport 1:s.
Sáivagilvvuin lea fas vuoitu skeaŋkakoarta 2500 ruvdnosaš skeaŋkakoarta man sáhttá geavahit ISAN skohterfitnodagas.
Guhká orui dan láhkái ahte ii okta ge dieđit čuovžža gilvui, muhto de fáhkkestaga sáddii Ann Cecilie Skum gova maŋimuš beivviid gilvvus. Dat gal lei oalle buorre jurdda sus, go vuittii 2500 ruvnno árvosaš skeaŋkakoartta ISAN skohterfitnodagas.
Gottii jiehtanasčuovža
Ann Cecilie Skum Guovdageaidnus eret lei irggiin ja ednuin oaggunmátkkis go jáhkkemeahttun stuorra čuovža dohppii su bastevuggii.
– Man hávski vuoitit, dat gal lea somá vuoitit maŋŋel go lean gaikon bajás diekkár jiehtanasa. Heaibut dainna čuovžžain lei hirbmat rahčamuš. Hirbmat erenomáš vásáhus, jáhkken álggos go njuikii ja bánccardii, ahte lea stuorra dápmot, duođaid. Lei erenomáš váttis váibadit dan. Easka go bođii lagabui fatnasa, de oidnen ahte lea hirbmat stuora čuovža. Dalle hirpmástuvven, go čuovžžas han lea njálbmi nu rašši, ja lea nu álki luoitit bastevuokka, muitala Ann Cecilie Skum.
Magihkalaš fámut
– Lea somá vuoitit, in mun láve goassige vuoitit maidige. Mun šadden beare sáddet Ávvirii gova, ahte bođii mielde, gal lea oalle jurddašmeahttun, dadjá Ann Cecilie Skum.
– Ii go leat imaš go čuovža dohppii bastevuggii go das lea nu unna njálbmi. Mot son dat lea vejolaš.
– Diibmá maid godden guokte čuovžža bastevuokkain, 1,8 kilo ja 2,1 kilo. Ale fal mus gal jeara, soaitá mus leat magihkalaš fámut. In leat gal goassige goddán nu stuorra čuovžža go dán, dat gal lei oalle somá, muitala Ann Cecilie Skum.
Čuovža man Ann Cecilie Skum gottii dettii ge jáhkkemeahttun 2,43 kilo.
Luossagilvvu vuoiti
Luossagilvvu vuoiti vuorbádeamis dán jagi ges lea Berit Anita Buljo Anti, gii lea 43 jagi boaris, orru Kárášjogas ja gottii 12 kilosaš luosa. Ávvira journalista riŋge ja muitala sutnje ahte lea vuoitán 5000 ruvnno árvosaš skeaŋkakoartta man sáhttá geavahit Sport 1:s.
– Na, sakka hirpmástuvvan, mun in leat diekkár gii vuoittán goassige.
– Fuobmájin sáddet sisa dan gova go oidnen Ávviris rekláma, ja ožžon ávžžuhusa, dan vuođul de. Jurddašin mun geahččalan, ja dan vuođul go hui hárve lea, ainjuo dáppe Iešjogas, ahte nissonolbmot leat mielde oaggungilvvus, muitala Berit Anita Buljo Anti.
Hárve go nissonolbmot oasálastet
Dábálaččat leat eanaš almmáiolbmot geat oasálastet luossagilvvus, muhto dán jagi ledje eanemus nissonolbmot mielde. Vuoitu dán jagáš luossagilvvus lea 5000 ruvnno árvosaš skeaŋkakoarta Sport 1:i, muhto Buljo Anti ii leat gal vel mearridan masa galgá geavahit vuoittu vel.
– In mun goit dieđe maid mun áiggun oastit ruđa ovddas, mun han lean justa oastán ođđa oaggunreaidduid. Lean oastán gállinbuvssaid, dolgevuoggastákku ja ođđa rulla stággui, go mu boares oaggunreaiddut leat nu olu geavahusas leamaš, muitala Berit Anita Buljo.
Balai beasaheames luosa
Biret Anita Buljos muitala mo lei go gottii dan stuorra luosa.
– Dat lei oba gelddolaš! Goazan lei beare loažža, luossa álggii mannat vulos joga, dalle šadden oalle balus ahte dál de manná. Lean ovdal dies beasahan luosa danin go lei loažža, doarggistin gal oalle bures, muitala Berit Anita Buljo Anti iežas vásáhusa birra.
– Mun ledjen okto álggos, muhto de bođii isit veahkkin, ja ožžon veahki čavget goazana. Kvártta goit sihkkarit bargen luosain, muhto dat lei nu nannosit darvánan, njuokčama duohkai. Isit válddii beahcehii gitta ja loktii luosa gáddái, luossa ii bastán roahkkái. Roahkki guoskkehii dušše ja luossa vuodjalii fávlái, ja dat dagahii mu eambbo ballui. Luossa manai guovdu joga, rávnnji guvlui, muhto mun ožžon dan fas gáddái, muitala movttegis Berit Anita Buljo Anti.
Stuorámus rávdu
Máret Juliánne Gaup (16) Guovdageainnus eret lea dán jagi vuoitán sáivagilvvu rávdogilvooasi stuorámus rávdduin go lei áhčiin fierbmebivddus čiegus jávrris. Rávdu dettii 4,9 kilo.
– Dat gal lea suohtas vuoitit. Mun ledjen várra vahku ovdal geahččan Ávviris, oidnen ledje olbmot sádden sisa govaid. Jurddašin go ledjen áhčiin mannan oaggut, ja go leimme goddán guoli, ahte moai gal bidje dohko, muitala Máret Juliánne Gaup.
Olu ruhta
17 máná oasálaste guollelihkkogilvui, ja vuoitin šattai Lajla Katrine Triumf (12) Guovdageainnus eret. Son gottii dorski go lei mearas oaggumin, ja lea dán jagáš guollelihku vuoiti.
– Lea hui somá vuoitit, go lea hui olu ruhta ja sáhttá oastit hui olu diŋggaid, dadjá Laila Katrin Triumf ja čaibmá.
– Ledjen álggos nie oaggume, mun ledjen dies ovtta sajis, ja de riŋgii eadni ja dáhtui sáddet gova Ávvirii jus lean goddán guoli, ja mun de sáddejin, vai in mun gal sádden, muhto eadni sáddii, loahpaha Lajla Katrine Triumf.
Mannan vahkku vuoitit
Mikkel Johan M. Utsi vuittii ovddit vahkku guollelihku, ja vuittii oaggunstákku man FeFo lea ruhtadan. Stina Solbakken lea mannan vahkku luossadronnet ja vuittii luossadronnet gaibagahpira, ja Ávvira čeabetliinni. Ann Cecilie Skum fas lei mannan vahkku sáivagilvvu čuovžaoasi vuoiti ja vuittii vuoggapáhka ja Ávvira čeabetliinni.
Dán jagáš oaggungilvu lea loahpahuvvon, oasálastte boahtte jagi oaggungilvvuide dan sadjái.
