-Almmuhus-
OĐĐASATBiillat beaškkehedje oktii Gáregasnjárggas

Biillat beaškkehedje oktii Gáregasnjárggas

-

-

Guokte biilla beaškkehedje oktii Gáregasnjárggas duorastaga. Nubbi biila ii galgga leat doahttalan čáhkkengeatnegasvuođa. Mánná lea váidalan bákčasiid niskkis, maŋŋel lihkohisvuođa.

Finnmárkku politiijaguovllu operašuvdnaguovddažis ožžo dieđu beal njealjis duorastaga ahte guokte biilla leat beaškkehan oktii Gáregasnjárggas, Suoma bealde.

Operašuvdnajođiheaddji, Søderholm, muitala ahte mánná, mii lei dan Suoma biillas, galgá leat váidalan bákčasiid, ja Norgga beale ambulánsa leat dikšumin su.

Oktiibuot njeallje olbmo ledje dan guovtti biillas go beaškkeheigga oktii, muhto dan eará golbmasii ii galgga šaddan mihkkege.

 

Unna lehtoš

Kárášjoga leansmánnikantuvrra politiijabálvá, Cato Arntsen, muitala ahte lea Suoma biila mii lea vuoddján nuppi Norgga biilla gilgii.

Lihkohisvuohta dáhpáhuvai juste luoddaearus, njuolga meaddel duollostašuvnna Suoma bealde, ja biillain ii galgga leat leahttu leamaš.

Suoma biila ii galgga doahttalan čáhkkengeatnegasvuođa, ja vujii de Norgga biilla gilgii mii juste bođi dakko meaddel.

 

(Ášši joatká gova vulobeale)


Kárášjoga leansmánnikantuvrra politiijabálvá, Cato Arntsen. Govven: Berit Marie Lise Eira

Ii bahuid cuovkanan

Norgga biila ii lean cuovkana nu bahuid, ja biilavuoddji sáhtii vuoddját fas báikkis biillain.

Báikkis fitne sihke politiijat, buollinčáskadeaddjit ja ambulánsa.

(Ášši joatká gova vuolábealde)


DUTKET: Norgga ja Suoma politiijat dutket vihttána. Govva: Josef Isak Utsi

 

Gánddat oaidnán

Lihkohisvuođa oidne gánddat geat ledje sihkkelastime.

Suoma politiija muitala Ávvirii ahte sin dieđu mielde lea Suoma biila boahtán Áŋŋela guovllus ja vuoddján Norgga biilla njeaiga mii bođii vuoji Anára guovllus. Gánddat muitalit ahte beaškkehii oalle garrasit, nu ahte sii ledje gal veahá suorganan.

Sii maid dihtet ahte duollostašuvnnas riŋgeje heahtetelefuvdnii. 

Biillat eai roakčanan fasttit, muhto Suoma biillas ledje goappašat «airbagat» olgun.

Norgga biila lei dan mađe ortnegis ahte lei vuoddján das eret, muhto moadde kilomehter eret rájás oidnui gádjunbiila dan viežžame. Orro dan láhkái ahte Suoma biila lea deaivan Norgga biilla maŋŋejuvlla bokte. 

 

-Almmuhus-