Odne bearjadat eahkes 21:00 áigge lei johtolatlihkohisvuohta Kárášjogas. Čieža olbmo ledje lihkohisvuođas ja golbmasa vieččai Sea-King gádjunhelikopter. Ii ovttas ge leat heaggavárra. (Geahča filmma vulogeahčen ášši).
Kárášjoga politiijabálvá Anders Solheim muitala ahte lihkohisvuođas lei Norgga campingbiila mas ledje guovttis ja olgoriikkalaš kássabiilla mas ledje vihtta olbmo.
– Orro leamen dan láhkai ahte lea leamaš meaddel vuoddjin lihkohisvuohta. Campingbiila lea rasttildan geainnu go galggai bisánit bisánanbáikái. Olgoriikabiila lea dasto álgán meaddel vuoddjit, ii ge leat fuobmán ahte campingbiila lei vuolgán rastá geainnu. Nu lea vuodjan njeaiga, muitala Solheim.
Eai leat vel dutkan
Son deattuha ahte sii politiijaid bealis eai leat vel dutkan sin geat ledje mielde lihkohisvuođas.
– Muhto eat várot goappá ge biillavuoddji gárrenoaivvis vuodján. Buohkat geat ledje lihkohisvuođa biillain leat rávisolbmot, dadjá Anders Solheim.
(Ášši joatká gova vuolde)
GOVVA: Josef Isak Utsi
Eai leat bahuid lápmahuvvon
Lihkohisvuohta dáhpáhuvai Guorpmehis, sullii miilla davábealde Kárášjoga márkanbáikki, Leavnnja guvlui.
Lihkohisvuođas ledje ge čiežas oktii buot, muhto Anders Solheim ii diehtán dalle go Ávvir humai suinna lihkohisvuođabáikkis man bahuid sii ledje lápmahuvvon. Son aŋkke sáhtii muitalit ahte buohkat ledje gozuid alde.
Oarje-Finnmárkku operašunguovddáš dieđiha twitteris ahte ii okta ge leat bahuid roasmmehuvvon.
(Ášši joatká gova vuolde)
Anders Solheim lohká, ahte ii leat leamaš hui garra oktii beaškkeheapmi, go campingbiila lei measta jaska čuožžume go kássabiila vujii njeaiga. Kássabiila lea ge dasto girdán eret luottas gos lea bisánan oalle čiekŋalis roggái.
Geahča video lihkohisvuođabáikkis:
