Viessodoallu mas leat guokte elbiilla, ja oktasaš vuodjingaska 25 000 kilomehtera jahkái, sáhttá seastit 20 000 ruvnno jahkái - jus buohtastahttá bensiidna- dahje dieselbiillain.
Viessodoallu mas leat guokte elbiilla, ja oktasaš vuodjingaska 25 000 kilomehtera jahkái, sáhttá seastit 20 000 ruvnno jahkái - jus buohtastahttá bensiidna- dahje dieselbiillain.
Norgga elbiilasearvi dieđiha preassadieđáhusas ahte elbiillain sáhttá seastit olu ruđa, jus buohtastahttá fossiila boaldámušain.
Iskkadeapmi, man leat čađahan, čájehii ahte 77 proseantta válde elbiilla ovdalii diesel- dahje bensiidnabiilla danne go lea hálbi ruovttus láddet biilla.
– Vuos lea buorre birrasii go oastá elbiilla, muhto seastá maid ruđa boaldámuššii. Elrávdnji elbilii máksá dušše viđadasoasi das maid fossiila boaldámuš máksá, lohká Norgga elbiilasearvvi generálačálli Christina Bu.
– Bearaš geat vudjet 25 000 kilomehtera jahkái, sáhttet seastit sullii 20 000 ruvnno jus ruovttus láddejit biilla, lasiha son.
Rehkenastán vuodjingaskka
Statistihkalaš guovddášdoaimmahat lea rehkenastán gaskamearálaš vuodjingaskka Norgga biillain, 12 480 kilomehtera.
Dat lea seamma maid Norgga elbiilasearvi gávnnahii iežaset iskkadeamis, ahte sullii bealli leat dáhkidan biilla 8 000-12 000 kilomehtera ovddas (23 proseantta) ja 12 000-16 000 ovddas (26 proseantta).
Miilahaddi 2,5 ruvnno
Gaskamearálaš haddi bensiinnas lea golmma maŋemuš jagis leamaš 14,35 ruvnno lihttaris, ja dieselis fas 12,23 ruvnno lihttaris.
– Jus bidjat vuođđun ahte gaskamearálaš bensiidnabiila doalvu 0,8 lihttara miilii, de máksá juohke miila 11,48 ruvnno. Dieselbiila doalvu dábálaččat 20 proseantta unnit boaldámuša, ja gaskamearálaš miilahaddi šaddá gávcci ruvnno, čilge ovdamearkkas.
Seammás máksá okta kilowattdiibmu (kWh) ovtta ruvnno, oktan buot divadiiguin. El-biila doalvu gaskamearálaččat gaskal ovtta ja bealgoalmmát kWh miilii. Dat boahtá das man stuora biila lea ja makkár áigodat lea. Miilahaddi šaddá 2,5 ruvnno.
– Jus lea okta stuora ja okta unna elbiillaš viessodoalus, de sáhttá rehkenastit 5000 ruvdnosaš jahkásaš elrávdnjegolu láddemii. Jus lea okta bensiidnabiila ja okta dieselbiila, de šaddá jahkásaš boaldámušgollu sullii 25 000 ruvnno, čilge ovdamearkkas.
