Almmuhus

Almmuhus

– Dál lea ámmen

DOALVVO LOBIHIS BISSU POLITIIJAIDE: Guovdageainnu leansmánnii, Klemet Klemetsenii, sáhtát doalvut bissu man leat árben dahje ii leat registrerejuvvon. Nu sáhttá visot Norgga politiijaguovlluin dahkat, doalvut lagamus leansmánnekantuvrii dahje politiijavissui, vai sii eai ráŋggáš du go leat atnán lobihis bissu iežat hálddus. Govven: Nils Johan Vars

Dál lea politiijain jođus kampánja ja sáhtát lobihis bissu buktit sidjiide, nu sii eai jeara manin ii leat registrerejuvvon ovdal. Muhto odne lea maŋemus beaivi go sáhtát dahkat dan.

Almmuhuvvuon: 
Vuossárga, 29 Miessemánu, 2017 - 15:21
Ođastuvvon: 
Ođastuvvon: 30.05.2017 - 08:52
Fáddásánit: 

Lea go dus bissu man leat oastán nu áigá ahte it leat dárbbahan ohcat bissoguoddinlobi, dahje árben bissu masa dus ii leat bissoguoddinlohpi?

De lea dál áigi doalvut daid politiijaide, go odne nohká politiijain kampánja man olis sii eai jeara dahje ráŋggáš du go it leat registreren bissu politiijaid registerii.

 

Registreret bissu

Guovdageainnu leansmánni, Klemet Klemetsen, muitala ahte odne sáhttá vel registrerehit bissu, dahje juo njuolggut buktit politiijaide bissu nu sii ráhkadit spiikkáriid dain.

– Dál de lea áigi buktit deike lobihis bissuid, go ihttin gal lea ámmen, lohká Klemetsen.

– Guokte jagi giddagasas čohkkát lea oalle garra ráŋggáštus go lobihis bissu atná iežas hálddus. Lobihis bissu leat buot bissut mat eai leat registrerejuvvon politiijaid bissoregisterii, muittuha son.

 

Diehtit vearjjuid

Klemetsen lohká ahte buot bissut galget registrerejuvvot.

– Olles ulbmil dáinna kampánjjain lea ahte buot bissut galget registrerejuvvot. Jus ii registreret áiggo ja váldit iežas háldui dan, de sáhttá buktit midjiide ja mii cuvket daid bissuid, muitala son.

 

– Naba jus leat ovdal 1990-logu oastán bissu, dalle go hávlára ii dárbbahan registreret, dárbbaha go dan buktit sisa, dahje registrerehit?

– Vel daid ge! Buot bissut galget registrerejuvvot. Ii okta ge Norggas beasa šat atnit bissu iežas hálddus jus ii leat registrerejuvvon politiijaid registerii, čilge Klemetsen.

 

Logenáre bissu

Dát kampánja guoská olles Norgii, ja áigemearri buktit bissu lea odne, miessemánu 31. beaivvi.

– Guovdageainnus mii leat ožžon guhtta bissu mat galget spiikarfabrihkkii, ja golbma bissu maidda leat ohcan bissoguoddinlobi, oktiibuot ovcci bissu, muitala Klemetsen vel loahpas, ja ávžžuha buohkaid dahkat dan ovdal ihttá beaivvi.

 

Ovdasiiddus dál