Guovdageainnu Kulturskuvla lágida breakdánsun kurssa dáid beassážiid, ja dat gal váibada, muitaleaba oasseváldit. Geahča video áššis!
Guovdageainnu Kulturskuvla lágida breakdánsun kurssa dáid beassážiid, ja dat gal váibada, muitaleaba oasseváldit. Geahča video áššis!
Beassášmárkaniin lea máŋggabealat prográmma. Kulturskuvla lágida breakdánsun kurssa, mánáide ja nuoraide.
Mia Bongo Norvoll ja Sunna Marie Joakimsen leigga juo olles leahtuin dánsume go Ávvir finai ságain.
– Dat lea oalle váttis, muhto somá. Dat manná jođánit, ja dasa ferte olu energiija, go váibá oalle álkit, lohká Sunna Marie.
– Dás váibá oba ládje, ledjen ikte juo dáppe, ja odne go lihkken, de lei olles gorut nu bávččas, reašká Mia.
Son lea ge viimmáskan, ja háliidivčče eambbo dánsut.
– Jus livčče vejolašvuohta Guovdageainnus joatkit dánsut, de livččen háliidit dánsut eambbo. Muhto eai soaitte dáppe máhttit dan dánsut, lohká Mia.
Liikoba dánsut
Sunna Marie ja Mia searvvaiga dálvet UKMii, dahje Nuoraid Kulturdeaivvadeapmái.
Soai dánssuiga ja beasaiga fylkkagilvvuide. Dat lei maid vuosttaš háve nieiddat dánssuiga fárrolaga, dan leigga guhká háliidan bargat.
– Moai leimme hárjehalláme gilvui, go su eadni muitalii munnuide dán kurssa birra. Moai diđiime ovttatmanos ahte háliideimme searvat, muitala Sunna Marie.
Su mielas lea hui somá go dákkár fálaldat lea, muhto dovdá ahte ii leat dat rievttes dánsunmálle sutnje.
– Munnje heive veahá eará ládje dánsut, muhto lea hui somá go Åsta gille boahtit oahpahit min! lohká Sunna Marie.
– Breakdánsumis sáhttá stoahkat
Åsta Maria Winge lea sudno oahpaheaddji, ja son lea Guovdageainnus beassážiid ávvudeame.
Son jurddašii go vuos lea dáppe, de sáhtášii oahpahit mánáid ja nuoraid dánsut. Breakdánsun gullá hip-hop kultuvrii.
Das leat olu váttis lihkastagat, ja olmmoš ferte hirbmat lášmat nagodit dánsut dan dánssa.
Åsta lea dánson breakdánsa 2001 rájes.
– Ikte ledje hirbmat olu olbmot, odne leat duššo njealjis. Leamaš hui buorre mokta, ja sii geat leat leamaš kurssas leat oahppan olu, lohká oahpaheaddji.
Breakdánsun lea hástaleaddji dánsa, go galgá olu njuikkodit, muhtumin láhttái velledit, ja njuikestit fas bajás.
– Breakdánsumis lea buorre ritma, lea hui monotona. Dan maid liikon lea ahte beassá leat mánná, ja beassá dahkat nu go áigu. Sáhttá stoahkat ja suohtastallát, go ii leat nu fásta go eará dánssat. Sáhttá fáhkka fuobmát ođđa dánsunvugiid, dasa mun liikon, muitala Åsta.
Iskame sámevuođa
Åsta Maria lea Guovdageainnus go lea gullán ahte jus galgá Guovdageidnui, de ferte beassážiid vuolgit.
– Jáhkán mus leat sámi máttut, ja lean veaháš iskame dan. Muhto dat ii leat nu dehálaš, mu mielas lea hui miellagiddevaš kultuvra ja lei aŋkke miella boahtit deike. Gullen ahte ferten beassážiid boahtit, ja de šattai nu. Lea leamaš somá leahkit dáppe, ja oaidnit sámi kultuvrra, man in dovdda nu bures. Oaidnit veaháš mii sámivuohta lea.
Kursa joatká odne
Vuosttaš beaivvi go kursa lágiduvvui ledje 12 máná ja nuora oahppame dánsut. Disdaga ledje njealjis.
Odne lea maŋemuš beaivi kurssas, ja Åsta sávvá odne maid bohtet olu oahppit.
– Mus leat hui áŋgiris oahppit, sii ohppet jođánit, ja leat gievrrat. Vuosttaš maid oahpat breakdánsumis lea molket čippiid, olggiid geavahit, ja geavahit ritmma mii lea iežas siste, vai nagodat oažžut ritmma dánsumii mielde.
