-Almmuhus-
OĐĐASATÁigot oahpahit nuoraide sámi somámus dánsunvuogi

Áigot oahpahit nuoraide sámi somámus dánsunvuogi

-

-

Sámi allaskuvlla ofelaččat bovdejit nuoraid boahtit sydisdánsunkursii, mii lea Máttasámi dánsunvuohki  ja skeŋkejit oasseváldiide 50 nuvttá bileahta nuoraidkonsertii seamma eahkeda.

– Mun gal lean dušše hirbmat stuorra modji go beasan dánsut sydisdánssa, dadjá preassadieđáhusas ofelaš Maja Fjellström, gii lea Steinkjeras eret.

 

– Somámus maid dieđán

Sámi ofelaččat leat máhccan Guovdageidnui beassážiidda. Dán gaskavahkku bovdejit ofelaččat sydisdánsunkursii Diehtosiidii.

– Lea hui somá doallat sydisdánsunkurssa Guovdageainnus. Dát dánsunvuohki lea dat somámus maid mun dieđán, nu ahte mun sávan máŋgasat bohtet oahppat ja dánsut minguin. Mis leat guokte hui čeahpes kursajođiheaddji boahtimin Plassjes velá, nu ahte dát šaddá hui somá, dadjá ofelaš Maja Fjellström.

 

Mihttu oahppat

– Mun gal fas veahá balan ahte juolggit eai nagot čuovvut gosa oaivi háliida daid doalvut. Ferten mieđihit ahte in leat dánson sydisa ovdal, in ge leat nu čeahppi dánsut swinga ge, muhto dál lea mihttomearri oahppat vaikke mo de leš, dadjá ofelaš Knut Mikkel Hætta.

 

Maŋŋel Báktehárjái

Sámi ofelaččat láidestit dasto maŋŋá dánsunkurssa Báktehárjái gos sii jotket guoimmuheamen lávddi alde dii. 20:00.

– Lea hui somá ahte mis leat 50 nuvttá bileahta nuoraidkonsertii seamma eahkeda. Sii geat serve dánsunkursii besset joatkit dánssa eahkedis. Nu ahte bohtet fal eahketkonsertii maid, mis leat smávva vuorbbit ja eará somásvuođat dán eahkeda, dadjaba ofelaččat Ole Nicklas Mienna Guttorm ja Oda Kjær Eriksen.

 

Ulbmil oahpásmuvvat sámi máŋggabealatvuođain

Ofelašdoaimma beassášdoalu ulbmil lea ahte sámi nuorat besset oahpásmuvvat sámi máŋggabealatvuođain ja eará sámi nuoraiguin. Ofelaččat váldet oahpu Sámi allaskuvllas čakčat ovdal go mátkkoštišgohtet.

Sámi ofelaččat leat dán skuvlajagi galledan ja doallan logaldallamiid badjel 50 skuvllas olles Norggas. Sydisdánsunkursa lea gaskavahkku 12.04.17 dii 14:00-16:00 Diehtosiidda kantiinnas. Nuoraidkonsearta lea Báktehárjjis seamma eahkeda dii. 20:00, čállet sámi ofelaččat preassadieđáhusas.

-Almmuhus-