Sámediggepresideanta lea ilus go Jovsset Ánte Sara vuittii guoddalanášši stáhta vuostá Hålogalándda Lágamánnerievttis.
Sámediggepresideanta lea ilus go Jovsset Ánte Sara vuittii guoddalanášši stáhta vuostá Hålogalándda Lágamánnerievttis.
Guovdageaidnulaš Jovsset Ánte Sara biehttalii čuovvoleames Eanandoallo- ja biebmodepartemeantta mearrádusa unnidit ealu 75 heggii. Sara ovddidii ášši diggegoddái, gos Sara vuittii stáhta vuostá, muhto stáhta guoddalii ášši Lágamánneriektái, mii hilggui guoddaleami bearjadaga njukčamánu 17. beaivvi.
Presideanta ilus
Sámediggepresideanta Vibeke Larsen lea ilus go Sara vuittii.
– Áiggun vuosttažettiin sáddet lihkkosávaldagaid Jovsset Ánte Sarai go vuittii Lágamánnerievttis. Prinsihpat mat leat vuođđun dán riektemearrádusas leat juste dat seamma maid Sámedikki lea čujuhan juo máŋga jagi, namalassii ahte stáhta vuogis movt unnidit boazologu leat olu váilevašvuođat. Stáhta ii váldde vuhtii sámiid rievtti iešmearrideapmái mii sáhttá rihkkut individuála vuoigatvuođaid, lohká Larsen preassadieđáhusa bokte.
Mearrádus fámoheapme
Lágamánneriekti cealká duomus ahte Eanandoallo- ja biebmodepartemeantta njukčamánu 10. beaivvi 2014 mearrádus unnidit boazologu lea olmmošvuoigatvuođaid rihkkun. Stáhta boazolohkounnideami mearrádus lea fámoheapme go mearrádus rihkku Sara rievtti doaimmahit iežas kultuvrra, nu go čuožžu ON konvenšuvnna 27. artihkkalis, siviila ja politihkalaš vuoigatvuođaid birra.
Buktá positiiva váikkuhusaid
– Lágamánneriekti lea dahkan hui mávssolaš čielggadeami álbmotrievtti dáfus, mii guoská kollektiiva ja individuála vuoigatvuođaide. Dán áššis lea stáhta rihkkon Jovsset Ánte Sara álbmotrievttalaš suodjaleami stáhta seaguheami vuostá. Háliidan rámidit su go duosttai čuoččuhit iežas rievtti bargat bohccuiguin, ja dan dehálaš gičču man son lea čađahan olu sámiid ovddas. Dát lea hui mávssolaš prinsihpalaš duopmu mii buktá olu positiiva váikkuhusaid olu sámiide, lohká sámediggepresideanta.
