-Almmuhus-
OĐĐASAT– Dán šiehtadusas leat nuorat vuoitit

– Dán šiehtadusas leat nuorat vuoitit

-

-

Boazodoallošiehtadusas bođii doarjja oahpahalliortnegii, ja boazodoalloskuvlla oahppit illudit go besset váldit fágareivve dan fágas mas háliidit.

Stáhta ii lean áigon ruhtadit boazodoallooahpahalli ortnega šat boahttevaš boazodoallošiehtadusain.

Norgga Boazosápmelaččaid Riikkasearvvi (NBR) ja stáhta jagi 2017/2018 boazodoallošiehtadusa šiehtadallamiin lei dat okta dain stuorámus áššiin.

Stáhta lei bivdán gávdnat eará ruhtadeddjiid ortnegii. Dat ii leat meinestuvvan, ja ortnet oaččui ain doarjaga boazodoallošiehtadusa bokte.

 

Nuorat illudit

Sámi Joatkkaskuvlla ja Boazodoalloskuvlla nuppi jagi oahppit illudit go oahpahalliortnet bisuhuvvo.

Sii leat viđas luohkás, ja áigot buohkat ohcat beassat boazodoalu oahpahallin. Ávvir deaivvada Biret Inga Eirain, Per John Eirain ja Mia Hættain.

– Lea leamaš čađat dat mii min movttiida čađahit oahpu, go beassá oahpahallin maŋŋil. Dat lea manne álggiimet dán skuvlii, beassat oahpahallin ja beassat váldit fágareivve dan fágas mas háliidit, lohket sii.

(Ášši joatká gova vuolábealde)


DUHTAVAČČAT: Sámi joatkkaskuvlla ja boazodoalloskuvlla boazodoalloluohká oahppit leat duhtavaččat go oahpahalliortnet bisuhuvvo. Beassat oahpahallin lei okta ákkain manne leat álgán dán skuvlii. Govva: Sárá Máret Rávdná Oskal

Boazodoallooahppit ledje álgán juo jurddašit maid čakčii galget, jus eai beasa oahpahallin álgit.

– Mis buorránii mokta oalle bures go gulaimet ahte ortnet bisuhuvvo, lohká Biret Inga Eira.

 

Gulahallan Jåmain

Sin luohkká lea čállán reivve NBR jođiheaddjái, Ellinor Marita Jåmai, mas čilgejedje manne lea dehálaš bisuhit oahpahalliortnega.

Sii deaivvadedje maid suinna Tråante 2017 doaluin, gos besse humadit suinna.

– Mii muitaleimmet ahte lea dehálaš boazodoalu boahtteáigái, ja midjiide nuoraide maid. Skuvllas oahppat olu boazodoalu birra, ja fágareive lea maid dehálaš, lohká Biret Inga.

– Boazodoallu dárbbaša eambbo gelbbolašvuođa, ja boazodoallu dárbbaša juohkelágan bargiid. Ii dušše boazodolliid, muhto sin geat barget almmolaš ásahusain maid. Sii dárbbašit maid gelbbolašvuođa boazodoalus.

 

Okta deháleamos áššiin šiehtadallamiin

NBR jođiheaddji lea hui duhtavaš go nagodedje bisuhit oahpahalliortnega.

Dat lei okta dain áššiin maid vuoruhedje eanemus šiehtadallamiin.

– Dán šiehtadusas leat nuorat vuoitit, lohká Ellinor Marita Jåma.

(Ášši joatká gova vuolábealde)


Norgga Boazosápmelaččaid Riikkasearvvi jođiheaddji Ellinor Marita Jåma. Vuorkágovva: Nils Johan Vars

Jåma rámida nuoraid geat leat áŋgirit suinna doallan oktavuođa, ja muitalan man dehálaš lea ahte boazodoalu oahpahalliortnet bisuhuvvo.

– Nuorat leat min boahtteáigi. Lea hirbmat dehálaš ahte boazodoalus lea rekrutteren, muhto lea maid dehálaš ahte boazodoallonuorat oidnet vejolašvuođaid bargat ealáhusa ovddas. Eai soaitte boazodilis barggus, muhto almmolaš ásahusain, lohká NBR-jođiheaddji.

 

Loga maid: – Garra šiehtadallamat

 

Nuoraid váldán vuhtii

Dat lea ge juste maid nuorat leat sutnje ovddidan, ja leat movttegat go Jåma lea sin váldán vuhtii.

Sii liikojit maid gullat ahte oahpahalliortnet lei okta dain čuoggáin maid NBR vuoruhii eanemus šiehtadallamiin.

– Lea buorre gullat, go lei dat maid logai ahte áiggui geahččalit doalahit, lohká Per John Eira.

– Orru váldán duođas min, ja mii leat ge ieža maid bargan garrasit vai ortnet bissu, lasiha Biret Inga Eira.

 

NBR šiehtadallanlávdegoddi lei ožžon čielga dieđu báikkálaš servviin ahte oahpahalliortnet lea juoga man ferte šiehtadallamiin vuoruhit.

– Báikkálaš servviide ja ealáhussii leat nuorat dehálaččat. Mii leat dan vuoruhan šiehtadallamiin, ja dat lea dieđusge čuohcan eará osiide šiehtadusas, nu go buvttadandoarjaga, čilge Jåma.

 

Ii dušše ealáhussii rekrutteret

Sámi Joatkkaskuvlla ja boazodoalloskuvlla rektor Ellen Inga O. Hætta lea ilus go dákkár boađus šattai.

– Boazodoalloskuvla lea dehálaš, go lea oahpahus mii lea heivehuvvon boazodoalu dárbbuide. Oahpahus lea heivehuvvon nu ahte nuorat galget čehppodaga oažžut boazodoalu birra, lohká son.

Son maid rámida nuoraid, guđet válde oktavuođa Ellinor Marita Jåmain, ja čilgejedje manne lea dehálaš ahte oahpahalliortnet bisuhuvvo.

(Ášši joatká gova vuolábealde)


Sámi joatkkaskuvlla ja boazodoalloskuvlla rektor Ellen Inga O. Hætta. Vuorkágovva: Sergey Gavrilov

Hætta lohká oahpahalliortnet ii leat dušše vai ealáhussii rekrutterejuvvojit nuorat, muhto vai boahtteáiggi byrokráhtain maid lea boazodoallomáhttu. 

– De leat sii vázzán boazodoalloskuvlla ja eará oahpu lassin, sii ipmirdit boazodoalu praktihkalaš oasi. Servodaga almmolaš ásahusaide šaddet byrokráhtat mat máhttet boazodoalu ja dat doalvu boazodoalu ovddasguvlui.

-Almmuhus-