Jovsset Ánte Sara vuordámušat leat ahte manná seammá bures Hålogalándda lágamánnerievttis go Sis-Finnmárkku diggegottis gos stáhta mearrádus fámohuhttui.
Odne iđđedis deaivvadii fas nuorra boazodoalli Jovsset Ánte Sara Eanandoallo- ja biepmudepartemeanttain diggevuogádagas, dán háve Hålogalándda lágamánnerievttis Romssas.
Diggesála lea áibbas dievva ja šadde stuorát diggelatnjii sirdit.
– Mus livčče vuordámušat ahte lágamánneriekti váldá vuhtii dan maid diggegoddi lea cealkán. Šaddet gelddolaš beaivvit, ollu dovddut leat čatnon áššái, dadjá boazodoalli Jovsset Ánte Sara.
Vásiha stuorra doarjaga
Jovsset Ánte Sara lohká dovdat doarjaga ja beroštumi iežas áššái olles sámis.
– Dovddan issoras stuorra doarjaga, sihke boazodoalus, sámis, oappás ja dáiddáriin. Dulkon dainna lágiin ahte sápmelaččat dovdet ahte dát ii leat vuoiggalaš, lohká Sara.
Buorre ášši
Su advokáhta Trond Biti lohká ráhkkanan nu bures go vejolaš ja son jáhkká Jovsset Ánte Saras lea buorre ášši.
– Jearaldat lea mo lágamánneriekti geahččá juridihka ja duohtavuođa beali dán ášši. Mis eai leat ođđa vihtanat, ášši lea seammá go diggegottis, lohká Biti.
Stáhta guoddalii
Sis-Finnmárkku diggegoddi lea fámohuhttán Eanandoallo- ja biepmudepartemeantta njukčamánu 10. beaivve mearrádusa jagi 2014:s mas leat mearridan Sarai 75 heakka, stáhta lea guoddalan ášši ja ášši gieđahallo Hålogalándda lágamánnerievttis dál.
Áššis leat golbma duopmára.
Ollu olbmot čuvvo ášši ikte
Ovddeš sámediggepresideanta Aili Keskitalo čuovvu ášši, muđuid leat Norgga Boazosápmelaččaid Riikasearvvis olbmot, ja eará berošteaddjit čuovvume ášši.
