Bargiidbellodaga parlamentáralaš jođiheaddji Per Mathis Oskal ii áiggo vuos maidege lohkat dan birra go Vibeke Larsen lea geassádan Bargiidbellodagas ja lihccon várrepresideanta.
Bargiidbellodaga nominašuvdnačoahkkimis mannan vahkkoloahpa nammaduvvui Ronny Wilhelmsen Bargiidbellodaga presideantaevttohassan boahtte čavčča sámediggeválgii.
Ronny Wilhelmsen lea leamaš Sámedikki várrepresideantan beannot mánu.
Ságat dat čálii ovddemuš ahte Sámediggepresideanta Vibeke Larsen (Bargiidbellodat) lohká ii sáhte dohkkehit dákkár meannudeami, ja lea cealkán eret Bargiidbellodagas.
Álggos dieđihii ahte geassáda sámediggepresideantan, muhto de son fas rievdadii oainnu. NRK Sápmái Larsen lohká ahte lea bálkestan Ronny Wilhelmsena eret ráđis.
– Son lei mielde eahpeluohttámušas mu vuostá. Várrepresideantta ja presideantta gaskkas ferte leat luohttámuš, lohká Vibeke Larsen NRK:i.
Eai leat vuos meannudan
Bargiidbellodaga sámediggejoavkku parlamentáralaš jođiheaddji Per Mathis Oskal ii áiggo vel maide lohkat movt son áigu meannudit ášši. Sii eai leat joavkkus vel meannudan maide.
– Lea oalle olu dáhpáhuvvan, mii eat leat vuos ollen maide joavkkus meannudit. Deháleamos lea ahte lea bargoráfi bellodagas ovddasguvlui, lohká son.
Oskal čilge ahte galgá odne čoahkkin joavkostivrrain ja maŋŋelaš olles joavkkuin.
– Doppe fertet digaštallat movt dál dahkat. Háliidan joavkkuin hupmat ovdal go maide eará logan, dadjá parlamentáralaš jođiheaddji.
Ii vástit
Ronny Wilhelmsen ii leat vástidan maidege mediaide dan rájes go beakkehii ahte Vibeke Larsen bálkesta su eret sámediggeráđis.
Iežas facebook-siiddus oidno dattege almmuhan ahte leat heaitán barggus Sámedikkis.
Ávvir lea maid geahččalan oažžut Ronny Wilhelmsen ságaide, muhto ii leat lihkostuvvan.
Vibeke Larsen ii ge lean olámuttos mánnodaga iđitdiimmuid.
