Áktor gearggai iežas loahppasániin, ja dan oktavuođas son gáibidii 10 jagi galgat áššáskuhtton Guovdageainnu dievddu čohkkát giddagasas go lea goddán Ruoŧa dievddu.
Áktor gearggai iežas loahppasániin, ja dan oktavuođas son gáibidii 10 jagi galgat áššáskuhtton Guovdageainnu dievddu čohkkát giddagasas go lea goddán Ruoŧa dievddu.
Skielleha diggegottis lea aiddo áktor, Andreas Nyberg, geargan iežas loahppasániin, ja dan oktavuođas son čuoččuhii ahte Guovdageainnu dievdu galgá dubmehallat 10 jahkái giddagassii.
Gávcci jahkái jus lea várjalan iežas
Nyberg lea čuoččuhan ahte Guovdageainnu dievdu galgá dubmehallat 10 jahkái, jus diggi ii oainne makkárge beliid áššis mat láivudit čuoččuhusa ahte Guovdageainnu dievdu gottii iešdáhtolaččat 20-jahkásaš Ruoŧa dievddu.
Son logai jus diggi oaidná ahte son lea várjalan iežas, dalle galget dubmet su eaktodáhtolaččat goddán Ruoŧa dievddu, ja de čuoččuhii son Guovdageainnu dievdu galgá čohkkát giddagasas gávcci jagi.
Okta hávvi várálaš
Otná beaivvi dikkis lei diggedoavttir, Gisela Petterson, gii čilgii makkár hávit ledje váralaččat gottahallan dievddus.
Son muitalii ahte lei okta dain háviin mii lei várálaš, dat lei dat hávvi mii lei olgešbealde ja bajágeahčen ratti.
Dakko lea niibi deaivan varrasuona, dakkár varrasuona gokko varra manná ruovttoluotta fas váibmui. Doavttir čilgii ahte dát hávvi dagahii dievddu jápmima.
Varddii siivvožit, muhto nu guhká ahte jámii dan geažil, muđui dan ovcci eará hávi geažil ii jáme dábálaččat olmmoš, čilgii doavttir.
Bealušteaddji maŋemus
Guovdageainnu dievddu bealušteaddji bivddii dikkis ahte son beassá maŋemus buktit iežas loahppasáni.
Dasa mieđai dikki duopmár.
Bivdá luovus luoitit
Bealušteaddji, Jens Nystrøm lea maid dieđihan ahte son áigu gáibidit ahte su klieantta galget luoittit luovos odne.
Jus dubmehallá, de boahtá giddagassii go gohččot.
