– Duostilvuođain oažžu Tsumbaráigi-bálkkašumi

– 24-jahkásaš Jovsset Ánte Sara, Fálá orohagas Finnmárkkus, čájehii duostilvuođa Norgga stáda vuostá go stáda mearridii bákkus njuovvat su bohccuid. Sara ii vuollánan, ii ge dohkkehan mearrádusa. Son stevdnii stáda ja vuittii, nie čállá artista Max Mackhé ággan dasa go geige Tsumbaráigi-bálkkašumi Sarai.

Sisabahkkemat

Boazodoallu vásiha ollu sisabahkkemiid.

– Industriijahuksen, ruvkket, infrastruktuvra, bartaguovllut ja turistadoaimmat leat dušše muhtin oasit doaimmain mat ásahuvvojit, dasa lassin go ollu návccat biddjojit viežžat energiija seamma guovlluin. Norgga stádas leat stuora beroštumit huksenguovlluin, čállá Max Mackhé preassadieđáhusas.

 Mackhé lea Tsumbaráigibálkkašumi vuolggaheaddji.

– Livččii bidjan su eret ealáhusas

– Stáda mearrádus njuovvat Jovsset Ánte Sara bohccuid livččii nu movt eará boazodolliide, dolvon su koŋkáneapmái ja bidjan su eret boazodoalus, ja dainna lágiin maid livččii son massán árbevirolaš eallinvuogi. Son stevdnii stáda ja vuittii, go mearrádus rihkui eatnamiid eaiggáduššanrievtti mii lea suddjejuvvon eurohpálaš olmmošvuoigatvuođakonvenšuvnna bokte, muitala Max Mackhé.

Čájehii duostilvuođa

Tsumbaráigibálkkašumi vuolggaheaddji oaivvilda Jovsset Ante Sara čájehan duostilvuođa go son, gii lea nuorra boazodoalli, lea stevdnen stáda.

– Son lei áibbas okto dahkan dan, go ealáhus, mas su bargu lea, vásihii vuoigatmeahttunvuođa mii bidjá eará birgejeddjiid ealáhusas, bargoustibiid ja bearrašiid vuostálaga, čállá Mackhé

– Su duostilvuođa ovddas ja garra jáhku dihte ealáhussii, oažžu Jovsset Ánte Sara Tsumbaráigibálkkašumi 2016, mii lea 10 000 ruvnno.

Artista Max Mackhé geige bálkkašumi.

Ovddit jagiid vuoitit leat: 2012 – Marie Persson, 2013 – Anders Sunna, 2014 – Jenny Laiti ja 2015 – Sara Marielle Gaup Beaska.