Dan cealká Økokrim guoddaleamis ja oaivvilda Sis-Finnmárkku diggegottis ledje beare garra duođaštusgáibádusat guovtti boazodoalli vuostá geat áššehuvvuiga mannan čavčča.
Dan cealká Økokrim guoddaleamis ja oaivvilda Sis-Finnmárkku diggegottis ledje beare garra duođaštusgáibádusat guovtti boazodoalli vuostá geat áššehuvvuiga mannan čavčča.
Hålogalándda Lágamánneriekti lea dál dohkkehan guoddaleami man áššáskuhttineiseváldi Økokrim ovddidii guovtti boazodoalli vuostá, geat oalát áššehuvvuiga mearkarievdadan-, biinnidan- ja boraspireverrošanáššis Sis-Finnmárkku diggegottis čakčamánus.
Guoddalanášši lea beaiváduvvon boahtte jagi geassemánu lohppii.
Ii čilgen manne nu garra gáibádusat
Guoddaleamis lea Økokrim ákkastallan earret eará ahte Sis-Finnmárkku diggegoddi lea bidjan beare garra gáibádusaid duođašteamis.
– Mii oaivvildit ahte Sis-Finnmárku diggegoddi ii leat válddáhallan duomus manne leat nu garra duođaštusgáibádusaid bidjan áššái. Áššis lea biddjon beare garra gáibádusat duođašteamis, ja dán oaivvildit mii lea vearrut, lohká Økokrima ossodatjođiheaddji ja ášši áktor, Hans Tore Høviskeland.
Máŋga prinsihpalaš beali
– Mii oaivvildit ahte ášši lea dehálaš ođđasit meannudit dikkis, danne go das leat máŋga prinsihpalaš beali. Earret eará de ii leat okta ge duopmostuollu goassige meannudan ášši boazodoalus mas ná roavvát leat verrošan, ja guovddážis lea dás maid elliidbiinniideamis sáhka. Iige leat 1992 rájes leamaš dikkis ná roavva boazosuolaášši, lohká Høviskeland.
Imaštallá ákkastallama
Dan nuorat dievddu bealušteaddji, advokáhtta Kjetil Nilsen, imaštallá áššáskuhttineiseválddi ákkastallama.
– Mun registreren sii ákkastallet ahte Sis-Finnmárkku diggegoddi lea bidjan beare garra duođaštusgáibádusaid, muhto diggegoddi han lea čuvvon njuolggadusaid. Danne lea veahá imaš go gáibidit ahte diggegoddi galgá ložžet duođaštusgáibádusaid, lohká Nilsen.
(Ášši joatká gova vuolábealde)
Beahtahallan
Nilsena muitala guoddaleapmi lei 14 siiddu, gos áššáskuhttineiseválddit leat guoskkahallan feara maid, ja sii maid sáddejedje vástádusa guoddaleapmái Lágamánneriektái.
– Min mielas ii doala áššáskuhttineiseválddi ákkastallan ja lean beahtahallan go Hålogalándda Lágamánneriekti lea dohkkehan guoddaleami. Lea oba dávjá ahte go soames dubmehallá diggegottis ja guoddala Lágamanneriektái, de hilgojuvvo ášši. Go áššáskuhttineiseváldi guoddala de ges álo dohkkehuvvo, lohká son.
Kjetil Nilsenis lea goitge jáhkku ahte Hålogalándda Lágamánnerievttis manná seamma ládje go diggegottis, ahte su klieanta áššehuvvá.
