Áhčis nájai ja čuokkui niibbiin

Diibmá ovdalaš juovllaid galledii badjel 40-jahkásaš almmái áhčis muhtin gielddas Nuorta-Finnmárkkus.

Galledeami oktavuođas finaiga áhčešguovttos feasttas.

Dan maŋŋel buollái riidu mii dagahii ahte bárdni skáidnii, nájai ja čuokkui áhčis niibbiin.

20-30 gearddi

Čukkohallan dievdu sáddejuvvui Girkonjárgga buohccivissui beaivvi maŋŋel dáhpáhusa, ja pasieantadieđuin boahtá ovdan ahte lei skáidnehallan, nájahallan ja čukkohallan 20-30 gearddi sihke gieđaide ja julggiide.

Nuppi gieđa vuolde lei albmás sullii 20 centimehter guhkkosaš hávvi.

Dasa lassin lei orbbeža suotna hávváduvvon.

Eaba muitte riiddu

Dikkis čilgiiga goappašagat ahte eaba muitte man birra leaba dikkáskan ovdal go doarráiga.

Soai leigga leamaš muhtin olgobáikkis juhkamin alkohola, ja goappašagat leigga juhkaluvvan badjelmeare.

Go olliiga ruoktot, de galgaba suhtadan ja doarrán. Bárdni galgá dan oktavuođas viežžan koahkkaniibbi, muhto dán ii loga dubmehallan dievdu muitit.

Son dattetge mieđiha ahte son dat ferte hávváduhttán áhčis.

Borran garra dálkasiid

Almmái guhte lea dubmehallan áššis lei maiddái beaivvi ovdal festemin muhtin fulkkiiguin.

Son galgá leat bivdán oažžut garraset tableahtaid vai oččošii nahkáriid.

Dievdu borai oktiibuot njeallje garra tableahta.

Son navdá garra dálkasiid dihte gárihuvvan menddo sakka beaivvi maŋŋel.

Áktor gáibidii guhkit giddagasduomu

Dievdu lei áššáskuhtton ráŋggáštuslága paragráfa 274 vuođul, ja áktor gáibidii ahte dubmehallá giddagasas čohkkát jagi ja guokte mánu.

Dievddu bealušteaddji ges dáhtui dikki áššehuhttit iežas klieantta.

Sis-Finnmárkku diggegoddi cealká duomus ahte badjel 40-jahkásaš almmái dubmehallá logi mánnui giddagassii.

Duomus gessojit vihtta beaivvi eret go almmái čohkkái vihtta beaivvi háldogiddagasas maŋŋel dáhpáhusa.

Áhččeolmmoš ii lean gáibidan makkárge buhtadusa.