Jodel gulahallanolmmoš čilge Ávvirii ahte jus šaddá nu olu givssideapmi Jodelis ahte bearráigeahččit eai nagot čorget daid eret, de sáhttet sii giddet Jodela nu ahte ii okta ge olles guovllus beasa Jodelii.
Jodel gulahallanolmmoš čilge Ávvirii ahte jus šaddá nu olu givssideapmi Jodelis ahte bearráigeahččit eai nagot čorget daid eret, de sáhttet sii giddet Jodela nu ahte ii okta ge olles guovllus beasa Jodelii.
Ávvir čálii ikte ášši, gos bođii ovdan ahte nuorat vásihit eanemus givssideami Jodel app’as.
Jodel lea dakkár sosiála media gosa sáhttá čállit dieđuid, ja buohkat geat leat seamma báikkis go don, oidnet dan dieđu.
App’a geavaha GPS-teknologiija, ja dat mearrida makkár dieđuid don oainnát.
Lea rievtti mielde álggahuvvon allaskuvlla ja universitehta studeanttaide, vai besset čállit mii sin skuvlabirrasis dáhpáhuvvá. Jodelii ii dárbbaš geavahannama ráhkadit, ja čálli lea čiegus.
Váldet duođas
Jodel váldokantuvrras Duiskas, čállet Ávvirii ahte sii váldet boasttugeavaheami ja givssideami hui duođalaččat, ja sii barget vai dat ii gávdnoše sin app’as.
– Rihkku buot man ovddas mii bargat, ja mii eat hálit ahte moattis galget billistit buohkaid ovdii. Leat olu studeanttat miehtá Eurohpá geat geavahit Jodela, juogadit jurdagiid, dieđuid ja ođđasiid, čállá Barbara Grzegorzewska, Jodel gulahallanolmmoš.
Son lohká ahte muhtun servodagain sáhttá čuožžilit dakkár dilli, ahte lea olu givssideapmi.
De sii čuvvot bures mielde visot mii čállo, ja sihkkot mii ii oro heivvolaš, jus das ii oro ávki, de Jodel sáhttá giddet olles servodaga, ja bidjat geo-áiddi mii dagaha ahte dan guovllus eai beasa šat Jodelii.
Olu doaimmat mat eastadit
Barbara Grzegorzewska čilge ahte sis leat golbma váldodoaimma mat eastadit givssideami ja boasttugeavaheami sin app’as.
– Álggos, mii áigut ahte servodagat galget beassat mearridit mii sin Jodelis oidno. Danne sáhttá jienastit bajás dahje vulos, ja de jávket dat mat ožžot olu vulos-jienaid. Nu bissu buorre vuoigŋa Jodelis. Dasa lassin lea vejolaš dieđihit Jodela moderatoriidda, bearráigehččiide jus orru diehtu Jodelis mii ii heive dohko.
Čilge maid ahte Jodelis leat algoritmat jođus mat bissehit boasttugeavaheami.
Jodelis lea maid sierra bargojoavku geat mannet daid iešguđet Jodel loggaid čađa, ja gehččet orrot go buot ortnegis.
– Duođalaš áššiid oktavuođas mii maid ovttasbargat politiijaiguin, vai sihkkarastit ahte ii leat lobihis aktivitehta Jodelis. Geavaheaddjit geat rihkkot min njuolggadusaid, eai beasa šat min app’a geavahit čállá Grzegorzewska.
– Mii ávžžuhit ahte buot min geavaheaddjit veahkehit min, eai searvva givssideapmái, ja veahkkin bearráigehččet mii Jodelis čállo, čállá Barbara Grzegorzewska Jodelis.
