Go Sámi joatkkaskuvlla oahppit fasttit bilkiduvvojit ja fallehuvvojit Instagram bokte, de čájehedje Kárášjoga nuorat vuostehágu ja hilgo daguid nu ahte givssideaddji jávohuhttui.
Go Sámi joatkkaskuvlla oahppit fasttit bilkiduvvojit ja fallehuvvojit Instagram bokte, de čájehedje Kárášjoga nuorat vuostehágu ja hilgo daguid nu ahte givssideaddji jávohuhttui.
Sámi joatkkaskuvlla Kárášjoga oahppit leat ikte bilkiduvvon ja cielahuvvon sosiála media, Instagram, bokte.
Oahppit soibmojuvvot leat furrošan, geavahan narkotihka ja leat njálggisteaddjin.
Eai dohkkehan
Sámi joatkkaskuvlla russapresideanta Sarah Mariell Balto muitala ahte go sii fuomášedje dan, de eai dohkkehan dan, ja go ledje russat maid daid gaskkas geat fallehuvvojedje, de šattai eanet persovnnalažžan.
– Geavaheaddji lea iežas gohčodan «garasjok» ja mii gal eat dieđe gii lei duogábealde dan geavaheaddjenama. Geavaheaddji lea goitge dál sihkkojuvvon eret Instagramas, ja jáhkán dat lei danne go ii okta ge liikon govaide iige juohkán daid, de oinnii ii dasa searvva oktage ja buohkat ledje vuostá dan. Soaitá maid sihkkojuvvon go ollu nuorat raporterejedje dán geavaheaddji Instagrammii, lohká Balto.
Priváhtagovva
Ii leat skihkka
Balto mielas ii leat skihkka nie viggat earáid ovddas bilidit.
– Dakkáris gii nie bargá ferte unnán bargu, ja lea ártet go dustet nie dáppe gos buohkat dovdet buohkaid. Son lohká gullan dákkár vásáhusaid birra eará báikkiin, iige jáhkkán ahte Kárášjogas maid gávdno.
Balto lohká sis lea hui fiinna skuvla, muhto lohká gullan dákkár čiegus givssidemiid birra.
– Lean gullan ahte dáhpáhuvvá, muhto in dieđe geaid birra lea sáhka, lohká russapresideantta Sarah Mariell Balto.
Ovttatmanos iskat
Sámi joatkkaskuvlla rektor Synnøve Solbakken-Härkönen ii lean gullange dán dáhpáhusa birra, ja lohká váivin gullat go sosiála media givssideapmi lea joavdan sin rádjái.
– Ii leat buorre gullat ahte diet máilbmi lea joksan min skuvlla maid. Dat dieđusge lea noađđin ohppiide geat vásihit daid ja mun áiggun dál ovttatmano iskat ášši dárkileappot ja gulahallat maiddái ohppiiguin, lohká son.
Dát dáhpáhus dattege ii leat vuosttaš geardde go Sámi joatkkaskuvlla oahppit leat vásihan neahttagivssideami.
Jodel-nammasaš sosiálamedias, mas buohkat leat anonymat, nu ahte ii oktage dieđe gii čállá, ledje maid negatiiva čállosat Kárášjoga joatkkaskuvllaohppiid birra árabus dán čavčča. Dat maid sihkkojuvvo jođánit.
– Sáhttit váidit politiijaide
Vaikko rektor mieđihage ahte ii leat nu oahpis Instagrammii, ja lohká soaitit šaddat hástalussan gávdnat gii lea ovddidan cielahemiid ja maid lea go obanassiige sin skuvlla oahppi.
– Min bealis goitge dahkat mii buot maid sáhttit oažžut čielgasa áššis, ja mii sáhttit maid politiijaide váidit. Dan eat vuos áiggo dahkat ovdal go lean gulahallan ohppiiguin dán birra.
Čielga rutiinnat
Rektor Solbakken-Härkönen lohká su dihtosii ii leat goassige ovdal boahtán dákkár givssideami birra, de leat sis hui čielga rutiinnat movt gieđahallat givssideami.
– Givssideapmi ja cielaheapmi ii leat dohkálaš ii makkárge hámis min skuvllas, lohká son.
Rektor lea hui duhtavaš dainna go nuorat čájehedje vuostehágu.
– Lea hui buorre go ii okta ge searvan ii ge dorjon, lohká son.
