Golmmas vudje menddo leahtus ja okta ges lea vuodján gárrenoaivvis.
Golmmas vudje menddo leahtus ja okta ges lea vuodján gárrenoaivvis.
Politiijat bearráigehčče mannan ija vudje go olbmot gárrenoaivvis Gilevuonas, Davvesiidda gielddas.
Bearráigeahčus duoguštedje badjel 20-jahkásaš albmás biilavuodjenkoarta go iskkadeamis čájehii ahte sus lei alkohola varas.
Girddihedje biillain
Romssa politiijat ges duoguštedje golbma biilavuodjenkoarta ikte. Buot golbma biilavuoddji girddihedje alla leahtus.
Badjel 30-jahkásaš nisu váldui vuodjimin 92 kilomehtera tiimmus báikkis gos lea lobálaš vuodjit 60 km/t.
18-jahkásaš almmái girddihii 117 km/t. geainnus gos leahttomearri lea 70 km/t.
Goalmmát biilavuoddji, badjel 20-jahkásaš dievdu ges váldui vuodjimis 108 km/t báikkis gos lea lohpi vuodjit 60 kilomehtera tiimmus.
Billistan busse
Politiijaloggas bohtet maiddái eará áššit ovdan. Stuoravuonas, Unjárgga gielddas lea muhtin busse billistuvvon mannan vahkkoloahpa.
Muhtin dahje muhtimat leat ráigan busses buot juvllaid. Politiijat bivdet olbmuid cavgilit jus dihtet vearredagus maidege.
Suodjalushárjehallan
Politiijat ja suodjalus čađahit hárjehallama Skogfoss nammasaš báikkis Báhčaveajis, Mátta-Várjjagis.
Hárjehallan čađahuvvo diibmu 0800-1600 rádjai vuossárgga.
Doarrun
Ikte eahket doarráiga guovttis Hámmárfeasta gávpotguovddážis.
Nubbi dolvojuvvui buohccivissui ambulánssain, muhto son ii leat garrasit hávváduvvon.
Dojii juolggi
Badjel 30-jahkásaš almmái dojii ikte juolggi go lei čohkkemis sávzzaid Sállanis.
Báikái sáddejuvvui Sea-King helikopter.