Leaba eadni ja vuolleahkásaš bárdni geat gottáhalaiga Girkonjárggas mannan ija čuovganeapmái.
Leaba eadni ja vuolleahkásaš bárdni geat gottáhalaiga Girkonjárggas mannan ija čuovganeapmái.
Nuorta-Finnmárkku politiijaguovlu duođašta ahte lea nisu (37) ja su bárdni (12) geat gottáhalaiga vuossárgga diibmu 04.13 muhtin orrunsajis Girkonjárgga guovddážis.
– Mii duođaštit ahte leaba 12-jahkásaš gánda ja su eadni geat gottáhalaiga Girkonjárggas, muitala Finnmárkku politiijaguovllu áššáskuhttinjođiheaddji Morten Daae.
Orrunsajis riedja
Politiijat ožžo dieđu mannan ija diibmu 04.13 ahte muhtin orrunsajis Girkonjárgga guovddážis lei hirbmat riedja. Politiijat vulge báikái ja gávdne golbma olbmo geat ledje bážáhallan. Áššáskuhttinjođiheaddji Morten Daae lohká sii leat dál jearahallame ránnjáid ja olbmuid geat sáhttet addit eanet dieđuid politiijaide.
– Leat dál dutkamin ášši, ja jearahallame ránnjáid ja olbmuid geat soitet diehtit mii lea dáhpáhuvvan beivviid ovdal goddima, dadjá Morten Daae.
Heahtejoavku ásahuvvon
Mátta-Várjjaga ráđđealmmái Nina Bordi Øvergaard muitala sis lea heahtejoavku gielddas mii galgá doarjut mánáid skuvllas gos gottáhallan gánda váccii skuvlla.
‑ Heahtejoavku lea sajis skuvllas gos sii leat dál bargamin doarjut sihke skuvlla mánáid ja bargiid, dadjá Mátta-Várjjaga ráđđealmmái Nina Bordi Øvergaard.
Poitijaviesus diibmu 12.00 álgá preassakonferansa gos politiijat, gielda ja heahtejoavku oassálastet.
