Stáhta dieđihan bággonjuovvamiid nuorra boazodoallái

Mannan dálvvi lágastii Fála boazodoalli, Oarje-Finnmárkkus, Eanandoallodepartemeanttain go oaivvildii sutnje mearridan nu unnán bohccuid ahte dat rihkku riikagaskasaš álbmotrievtti.

Son vuittii Norgga stáda vuostá Sis-Finnmárkku diggegottis mii dupmii Boazodoallostivrra mearrádusa lobiheapmin.

Eanandoallo- ja biepmodepartemeanta ii dohkkehan diggegotti duomu ja guoddaledje ášši Hålogalándda lágamánniriektái. Ii leat vel čielggas goas dán ášši meannuda lágamánniriekti.

Bággonjuovvama dieđihan

Dál čájehuvvo ahte Norgga stáhta, Eanandoallodirektoráhta olis, ii leat orustahttán dán ášši vaikke Norgga diggevuogádat ii leat vel geargan meannudeamen ášši, namalassii das ii leat vel celkon riektefámolašduopmu.

Eanandoallodirektoráhta lea ge sádden reivve Jovsset Ánte Sarai mas dieđihit, ahte sii leat dál dáhtton Boazodoallostivrra ráhkkanišgoahtit čađahit baggonjuovvamiid, su siidaoasi vuostá.

Dat mearkkaša ahte dasto Stáhta vuovdá bákkus sus bohccuid 75 heakka rádjái.

– Mus gal šaddá issoras ballu go sápmelaččas ii oro ge veaháš riektesihkkarvuohta, lohká son ja joatká:

– Go lágas ii leat ávki, eai doahttal bisánit go ášši lea ain dikkis. Sii áigot bákkus rivvet ealu ovdal go lea mihkkige čielgan dien áššis, go eai leat heaitán sáhkuid ge sáddemin, vaikke vuiten vuosttaš vuorus dikkis, dadjá Jovsset Ánte Sara.

Advokáhta garrasit moaitá

Jovsset Ánte Sara advokáhta Trond Biti moaitá garrasit stáda bargovugiid dán áššis, ja eahpida etihka ja lobálašvuođa reivves maid su klieanta lea ožžon Eanodoallodirektoráhtas.

Biti eahpida maiddái ahte doahttalit go boazodoalloeiseválddit oba ge álbmotrievtti dán áššis.

Eahpida lobálašvuođa

Advokáhta Biti eahpida lobálašvuođa bidjat johtui baggonjuovvama go ášši lea ain dikkis.

Son lohká ahte su mielas lea dás etihkka jearaldat, ii fal juridihka dásis, muhto etihka dásis, go eai sáhte vuordit dassážii sii leat geargan dáinna áššiin.

Son mieđiha maid ahte jus stáhta vuoitá dáinna áššin, de lea buot ortnegis, de ožžot dahkat justa maid háliidit, muhto dál go Sara lea vuoitán vuosttaš vuoru dikkis, de ovddidit dál diekkár áitagiid.

Duopmu ii celkon

– Mu mielas lea oalle ártegis etihkka stáhtas. Ii leat sihkkar ahte dat lea lobálaš ge, muhto dan in leat nu garrasit iskan vel, lohká Biti, ja lohká vel:

– Aŋkke lea áibbas čielggas ahte dán áššis ii leat vel celkon duopmu mii lea fámus, ja danne in jáhke leat lobálažžan masa dál ráhkkanit, dadjá son.

Son áigu čállit dál reivve Eanodoallodirektoráhtii gos son boahtá cuiggodit daid etihkka beliid áššis.

Eanandoallodirektoráhtas ii sáhttán okta ge vel kommenteret ášši.