-Almmuhus-
GUOIMMUHEAPMIRávisolbmuid gilvui searvvaiga

Rávisolbmuid gilvui searvvaiga

-

-

«Rávisolbmuid gilvui dieđusge serve, go doppe leat buoret vuoitu»; nie dajai Knut Erik áhččásis go gottiiga luosa ovttas.

Åge Solbakken ja su bárdni, Knut Erik, leigga áidna geat gottiiga luosa ja dieđiheigga Ávvira luossagonagas-gilvui ovddit vahkku. Luossa dettii 6,2 kilo, ja goddui Vássetsavvonis, Ássebávtti vuolábealde.

Soai oaččuiga ge goabbáge eksklusiiva luossagonagas gahpira, go vuittiiga ovddit vahkku luossagonagasgilvvu.

 

Earát manne

Åge Solbakken muitala ahte soai leigga Vassetsavvonis bivdime fatnasis, guvttiin stákkuin.

Son muitala ledje earát vel savvonis, muhto sii luhpe eret doppe ja soai báziiga guovttá. De soai sirddiiga vuolágeahčái savvona, go de fáhkka lei gitta luossa.

 

Ii diehtu goabbá gottii

– Sihten olbmá doallat stákkus seammás go gessen bajás dan nuppi vuokka. Ja son šattai doallat stákku gitta gáddái olliime, dalle moai veahkkálaga oaččuime bajás luosa, muitala son,  ja lasiha vel:

– Na ii leat diehtu goabbá dat lei gii gottii luosa.

 

Goddán stuoribu

Solbakken muitala iežas goddán birrasii 15 kilosaš luosa ovdal

– Mus ii lean bismárra mielde dalle, nu ahte in beassan vihkket jur nu juste, muitala son.

 

Viššal bivdit

Solbakken muitala iežas luntta viššalin guliid bivdit: 

– Moai bivde sihke jogaid ja jávrriid, ja dál beasai iežas vuosttaš luosa luntta goddit. Soaitá movttáskit vel eambbo, muitala Åge Solbakken, ja nahkeha gahpira oaivái mii muitala ahte lea ovddit vahkku luossagonagas, ovttas su bártniin.

 

Vuoitte eksklusiiva gahpira

Son guhte goddá vahkku stuorimus luosa, son oažžu gahpira mii čájeha ahte lea luossagonagas, dahje dronnet.

Searvva don ge ja čájet olles álbmogii ja eará luossabivdiide gii dat duohta luossagonagas lea.

Son guhte  geasis goddá stuorimus luosa, vuoitá vel 3000 ruvdnosaš skeaŋkkakoartta mainna beassá Kárášjogas Sport1 rámbuvrras gávppašit.

 

 

-Almmuhus-