Sámi musihkkafeastivála ođasmahttet Sámi Grand Prix, ja čuovvolit Eurovision vuogádaga ja lágidišgoahtá SGP báikkis gos vuoiti lea eret.
Sámi musihkkafeastivála ođasmahttet Sámi Grand Prix, ja čuovvolit Eurovision vuogádaga ja lágidišgoahtá SGP báikkis gos vuoiti lea eret.
Sámi musihkkafeastivála áigot ođasmahttet Sámi Grand Prix (SGP) vel eambbo, ja eanet lahkonit Eurovision Song Contest. Danne leat mearridan ahte boahtte jagi lágidit SGP doppe gos dán jagaš lávlunoasi vuoiti Ella Marie Hætta Isaksen lea eret, namalassii Deanus.
Veahkkin goluid gokčat
Sámi musihkkafeastivála buvttadeaddji Nils Johan Vars muitala ulbmil lea olahit viidábut sami musihkain, iige leat nu báikkálaš.
– Dat dieđusge mielddisbuktá ahte Deanu gielda ferte váldit ovddasvástádusa ja leahkit mielde gokčame goluid, ovda mearka dihte dan streamema. Son čilge lea ain Sámi musihkkafeastivála gii galgá lágidit doaluid.
Loktet luođi vel eanet
Vars čilge juoiganoassi maid galgá Deanus ja galgá ain leahkit dehálaš oassi SGPas.
– Mii leat dán jagaš feastiválas lokten luođi árvvu ja luohti galgá ain guovddážis. Mii áigut loktet luođi vel eanet ja dáinna sirdimiin sávvat mii loktet beroštumii Deanu guovllus.
Hirbmat buorre sáhka
Deanu sátnejođiheaddji Frank Ingilæ lea hui duhtavaš mearrádusain, ja sávvá bures boahtima SGP Detnui.
– Dat lea hirbmat buorre sáhka, ja midjiide lea sámegiella ja sámivuohta hui dehálaš ja dál beassat maiddái Deanu gielddas leahkit lágideaddjin Sámi stuorámus musihkkadáhpáhusas, lohká son.
Vuorkágovva: Inga Marie Guttorm
Dehálaš márkanfievrrideapmi
Ingilæ lohká sii gal áinnas leat mielde gokčame goluid SGP oktavuođas.
– Dakkár dehálaš dáhpáhussii fertet mii várret ruđa boahtte jagi bušeahtas, go dat lea maiddái dehálaš márkanfievrrideapmi min gildii, lohká Ingilæ.
Sadji eanet artistaide
Sámi musihkkafeastivála buvttadeaddji lohká Guovdageainnus gal šaddet ain šaddet konsearttat, ja go ii lágiduvvo SGP buorida áiggi Báktehárjjis.
– Dat buktá dušše buori, go de beassat árabut álgit konsearttaiguin beassášlávvordaga ja lea maid vejolaš čáhkket saji eanet artisttaide, lohká son.
