-Almmuhus-
OĐĐASATNJFF:s ii dadjamuš vuoigatvuođaide

NJFF:s ii dadjamuš vuoigatvuođaide

-

-

Finnmárkkuopmodat (FeFo), Norges Jeger- og Fiskerforbund (NJFF) ja NJFF Finnmárku leat diibmá juovlamánus vuolláičállán ovttasbargošiehtadusa mo hálddašit bivddu ja guolásteami Finnmárkkuopmodagas. Šiehtadusa leat oallugat sámi birrasiin moaitán.

Joseph Fjellgren čállá lohkkiidreivves dan šiehtadusa sáhttá gohčodit boasttuvuohtan Finnmárkku álbmoga vuostá, dahje FeFo stivra ii leat fáhten váikkuhusaid dán šiehtadusas. Goappašagat leat goitge duođalaččat. Viđas dan guđa stivralahtuin eai lean eahpádusas vuolláičállit šiehtadusa.

– Duohtavuohta šiehtadusain lea ahte NJFF galgá mielde váikkuhit bivddu ja guolásteami hálddašeami Finnmárkkus boahttevaš njeallje jagi, ja sis lea opšuvdna guhkidit šiehtadusa. Dasa lassin ii leat šiehtadus leamaš gulaskuddamis, nu ahte álbmogis, politihkkariin, fágabirrasiin, organisašuvnnain ja priváhta olbmuin ii leat leamaš váikkuhanvejolašvuohta gažaldahkii galgá go šiehtadus dahkkot ja maid galgá sisttisdoallat, čállá son.

 

Eahpida ulbmiliid

Fjellgren maid eahpida NJFF ulbmiliid šiehtadusas.

– Ii ovttasge earás go FeFos ja NJFF:s dieđe šiehtadusa sisdoalu ja lea go dat buoremus Finnmárkku álbmogii. 97 proseantta NJFF miellahtuin orrot olggobealde Finnmárkku, ja golbma proseantta, dahje 2700 miellahtu, orrot Finnmárkkus. Son ballá ahte NJFF:s lea jurdda sihkkarastit miellahtuide olggobealde Finnmárkku bivdin- ja guolástanvuoigatvuođaid. Fjellgren iige jáhke ahte NJFF dahká maidege nannemis Finnmárkku bivdiid ja guolásteddjiid vuoigatvuođaid.

 

Šiehtadusa sisdoallu

Šiehtadusas ovdanboahtá ahte NJFF:s ja FeFos lea oktasaš beroštupmi sihkkarastit buohkaide beroštumiid, sihke finnmárkulaččaide ja muđuid bivdiide/guolásteddjiide Norggas. Šiehtadus galgá sihkkarastit buori ja gelbbolaš hálddašeami, gos láhčet bivdinvejolašvuođaid, guolásteami ja meahcásteami Norgga stuorámus fylkkas.

 

Ii atte vuoigatvuođaid

FeFo stivrajođiheaddji Marit Kirsten Anti Gaup lohká šiehtadus NJFF:in ii atte makkárge vuoigatvuođaid miellahtuide, danne go lea dušše ovttasbargo- ja gulahallanšiehtadus.

– FeFo ulbmil lea NJFF:in ovttasbargat doaimmaiguin, nu ahte eat leat máŋggas geat bargat dan seamma. NJFF:s ii leat mihkkege dadjamušaid bivdo- ja guolástanvuoigatvuođain eaige sii oaččo makkárge ovdamuniid dan ektui dáinna šiehtadusain. Sin miellahtut šaddet čuovvut seamma njuolggadusaid go muđui eará olbmot.

 

Lei oažžut gulaskuddojuvvot

Anti Gaup lohká ipmirdit ahte lea vuosteháhku šiehtadussii, jus lea dat ipmárdus ahte addá NJFF:i sierra vuoigatvuođaid Finnmárkkus.

 – Lea nu ahte NJFF aŋkke lea dáppe Finnmárkkus, ja go mis lea ovttasbargu, de mii eambbo diehtit sin doaimmaid birra, lohká son.

Stivrajođiheaddji maid lohká ahte šiehtadus ii leat gulaskuddamis leamaš go dat ii váikkut moktege.

– Dat ii leat dakkár stuora ja dehálaš šiehtadus, muhto mii leimmet galgat dalle álggos sáddet gulaskuddamii, vai livččiimet duhtadan buohkaid, lohká Anti Gaup.

-Almmuhus-