Guokte boazoeaiggáda Finnmárkkus leaba áššáskuhtton go galgaba earret eará illastan bohccuid reaidduin ja sádden ráppiid sisa oažžun dihte boraspirevahátbuhtadusa.
Guokte boazoeaiggáda Finnmárkkus leaba áššáskuhtton go galgaba earret eará illastan bohccuid reaidduin ja sádden ráppiid sisa oažžun dihte boraspirevahátbuhtadusa.
Boazopolitiijat leat dutkan guokte boazoeaiggáda ja váruhit soai leaba reaidduin hávvudan oktiibuot 25 bohcco nu ahte orrot boraspirevahágat, ja sádden ráppiid Fylkkamánnii oažžundihti buhtadusa boasttu vuođu alde.
Soai leaba maid áššáskuhtton rievdadan earáid mearkkaid alcceseaskka, oktiibuot 40 heakka. Dát dáhpáhusat galget dáhpahuvvon gaskkal jagiid 2010 ja 2014.
Ášši sáddejuvvui Boazopolitiijain Økokrimii, guhte dál lea áššáskuhtten dan guoktása.
Økokrim lea bidjan čuoččuhusa ahte boazoeaiggádat galgába máksit buhtadusa stáhtii, Birasdirektoráhtii badjel 800.000 ruvnno goabbáge. Áktor lea bidjan gáibádusa elliidsuodjalanlága paragráfa 33 vuođul, mas daddjo guhte ii doahttal dán lága dahje roavvat rihkku dan, sáhttá massit rievtti bargat elliiguin ovtta vissis áigái dahje vaikko agibeaivái.
Ášši boahtá bajás Sis-Finnmárkku diggegoddái boahtte jagi mielde.
