Sámi servvodatdigaštalli Lásse Kvernmo lea ráhkadan listtu mas lea logi cealkaga maid sámit berreše dadjat dáččaide.
Lásse Kvernmo, gii lea eret Deanus ja Romssas, almmuhii gieskat iežas Facebook-siiddus listtu masa son lea bidjan logi buoremus cealkaga.
– Juo, dá leat logi buoremus cealkaga maid mii sámit berrešeimmet dadjat dáččaide, juste dan dihte go dáččat dávjá dadjet sullii dan seamma midjiide, lohká Kvernmo NRK Sápmái.
Dán listui orrotge su Facebook-čuovvut ja -ustibat bures liikostan.
Oppastahttit
Lásse Kvernmo lohká NRK Sápmái ahte su ágga dieđusge lea ironiseret ja oppastahttit dahje generaliseret.
– Mii han dávjá oppastahttit go lea unnán máhttu dahje leat ovdagáttut maid olbmot jáhkket duohtan. Jurddašin dál lea áigi sámiide maid čájehit dan seamma. Dás vikkan humoristtalaččat geahččalit čalmmustahttit erohusa das makkár oainnut dáččain leat sámiide, ja das mii lea duohta, lohká Kvernmo.
Dá lea listu:
1. Mu máttarmáttaráhkku lei rivgu.
2. It han don oro oaidnit dego dáčča.
3. Mii oahpaimet unnán din birra skuvllas, muhto dieđán dii čuoigabehtet.
4. In leat rasista, mus han lea ustit gii lea dáčča.
5. Dii gáibidehpet buhtadusa go boraspiret goddet sávzzaid, go massibehtet dietnasa, jna. Manne nu gáibidahkes?
6. Lea oalle divrras go lea sierra stuoradiggi. Leat go jurddašan dan?
7. Manne ehpet sáhte hupmat eŋgelasgiela vai buohkat ipmirdat mii daddjo?
8. Dieđusge lean mun borran biergogáhkuid oktii.
9. Jus mun boađán Osloi, dohkkehuvvon go mun de?
10. Dus lea fiinna bunáda. Oaččun go mun govvet iežan ovttas duinna?
