Almmuhus

Almmuhus

Jođiha duohta­vuođa­kommi­šuvnna čállin­gotti

ÁLGÁ GUOVVAMÁNUS: Liss-Ellen Ramstad lea virgáduvvon jođiheaddjin Stuoradikki duohtavuođa- ja seanadanlávdegoddái. Preassagovva

Golmmas leat dál virgáduvvon dán čállingoddái, mii galgá leat UiT Gávpotallaskuvllas Romssas.

Published date: 
Gaskavahkku, 16 Ođđajagimánu, 2019 - 11:28
Updated at: 
Ođastuvvon: 16.01.2019 - 14:41
Fáddásánit: 

Stuoradiggi lea virgádan golbmasa Duohta­vuođa- ja seanadankommišuvnna čállingoddin.

Jođiheaddji lea Liss-­Ellen Ramstad (38), geas lea riektesosiologiijamaster ja lea 2007 rájes bargan Sámedikkis vuoigatvuohta- ja internašunálaáššiiguin.

2015-2016 lei son Gielda- ja ođasmahttindepartemeanttas čállin sámi giellalávdegoddái, mii buvtti NÁČ-­dieđáhusa Váibmogiela birra. 

 

Golmmas oktiibuot 

Inger Elin Utsi (43) lea virgá­duvvon ráđđeaddin.

Son lea guovdageaidnulaš ja lea ovddeš NRK ja Altaposten journalista ja NSR-politihkkár. 2011 rájes lea bargan Árktalaš Universitehtas (UiT) diehtojuohkkin Álttás.

Guorahalli Katrine Baglo (48) boahtá Verdalas, ja sus lea váldofága arkeologiijas ja nákkáhalai 2011 doavttergráda sámi etnográfalaš čájáhusaid birra Eurohpás ja Amerihkás. Son lea muđui bargan Sámedikkis Romssa universitehtas (UiT). 

 

Álget guovvamánus

Stuoradiggi ásahii geasse­mánus 2018:s duohtavuođa- ja seanadanlávdegotti mii galgá guorahallat movt stáhta dáruiduhttinpolitihkka lea čuohcan sápmelaččaide ja kvenaide.

Ođđajagemánu loahpas – guovvamánu álggus galget sii Stuoradiggái váldit vuostá barggu.

Čállingoddi galgá doaibmat Gávpeallaskuvllas UiT:s Roms­sas, dieđiha Stuoradiggi. 

På forsiden nå