Almmuhus

Almmuhus

Oanehis áiggis čoaggán badjelaš 3500 vuolláičállaga

Máret Ánne Sara lea ilus go miehtá máilmmi leat gergosat veahkehit bajidit jiena áššis mas lohket Norgga eiseválddiid čađahit veahkaválddálašvuođa sámiid vuostá. Dá lea Máret Ánne Sara su vuosttaš installašuvnnain Sis-Finnmárkku diggegotti visttu olggobealde go vuosttaš vuorus lei Jovsset Ánte ášši dikkis. Govven: Inga Marie Guttorm

Jovsset Ánte áššái lea buollán beroštupmi ja áŋgiruššán olggobealde Norgga ráji. Olbmot miehtá máilmmi leat searvan nammačuorvumii dan vuostá movt Norga meannuda sápmelaččaid.

Vuollaičálaakšuvdna jođihuvvo guhkkin eret Norggas, Nederlánddas, ja lea Toine Korthout gii jođiha akšuvnna.

– Go gullen dan mii Norggas dáhpáhuvvá, ahte stáhta bágge boazosámiid njuovvat sin ealuid, mas leat stuora váikkuhusat sámiid eallimii ja kultuvrii, de gal mun ge hárdašuvven, lohká Korthout preassadieđáhusas.

Son válddii oktavuođa Pile O´Sámiin ja dáiddáriin Máret Ánne Sarain gullan dihte movt sáhttá veahkehit.

 

Máilmmis áŋgiruššet Norgga fápmogeavaheami vuostá

Vuollel njeallje beaivvi maŋŋel go vuolláičálaakšuvdna álggahuvvui, de leat badjelaš 3000 olbmo miehtá máilmmi  dorjon kampáŋja vuolláičállagiin.

– Leat njuolggut miehtá máilmmi boahtán doarjagat, lohká Korthout ja čujuha áŋggiruššamii mii boahtá Skandinávias, Baltikumas, Ruoššas, Islánddas, Kalaallit Nunaatas, Nederlánddas, Stuorabritánnias, Duiskkas, Luxembourgas, Sveitsas, Portugálas, Serbias, USA:s, Kanadas, Mexicos, Brasilas, Lulli-Afrihkás, Egyptas, Myanmaras, Thaeatnamis, Japánas, Austrálias ja Ođđa Selánddas.

 

Šohkka ja eahpeosku

– Lea olu buorre doarjja mii boahtá miehtá máilmmi, muhto ášši maid váivvida, lohká Korthout.

Son vásiha ahte olbmot eará sajiin máilmmis, geat gullet dán ášši birra, suorganit  eai ge báljo jáhke dasa.

– Olbmot máilmmi jáhkket Norga leat buoremus ovdamearka olmmošvuoigatvuođaid fuolahusriikan. Dađi bahábut ferten muitalit ahte dat lea illušuvdna ja ahte sámi guolásteaddjit ja sin servvodagat, seammá ládje go dat mii dáhpáhuvvá boazosámiiguin, leat massán rivttiid ja kultuvrra sihke Norgga ja Suoma ráđđehusaide, lohká son.

 

Giitevaš

Máret Ánne Sara lea giitevaš dan ollu doarjaga ovddas maid lea ožžon miehtá máilmmi, ja son oaidná ahte Norgga láhttenvuohki ON ovddas, lea internašunála ášši mas bohtet váikkuhusat doalahit ja doahttalit olmmošvuoigatvuođaid miehtá máilmmi.

– Lean ilus go máilbmi oaidná min, ja ahte leat gergosat veahkehit dán áššis mas ráđđehus ja fápmohálddašeaddjit dohkkehit dakkár roavva veahkaválddálašvuođa eaŋkilolbmuid vuostá, ja dan politihka ja lága mii min álbmoga billista, lohká Máret Ánne Sara.

 

Várálaš signála buohkaide

Sara lea boktán hirbmat internašunála beroštumi iežas dáidagiin mas leat boazooaivvit, mii gohčoduvvo Pile O’Sápmi, mii kritihkkalaš geahčestaga geige dan «vuoiggalaš» Norgga vuostá, ja dat oaidnemeahttun doarrun mii dáhpáhuvvá Norggas.

– Lea várálaš signála go stáhtat ja fápmovuogádagat dohkkehit dakkár veahkaváldimiid ja hilgot ON dán vuogi mielde. Go Norga hilgu internašunála gozihanprográmma go dat dáhpáhuvvá iežaset riikkas, de ráhkaduvvo várálaš govva. Jus mii dohkkehit dán Jovsset Ánte vuostá, de leat dohkkehan ahte stáhta ii doahttal olmmošvuoigatvuođaid dahje eamiálbmotrivttiid. Dalle sáhttá vaikko gii leat dat nubbi geas eai leat rievttit, lohká Sara loahpas preassadieđáhusas.

På forsiden nå