Almmuhus

Almmuhus

Eanemus lohkkon áššit 2018:s

Dán áššái leat čohkken dan logi ášši maid min lohkkit lohke eanemusat vássán jagis.

Published date: 
Maŋŋebárga, 1 Ođđajagimánu, 2019 - 12:40
Fáddásánit: 

Dása leat čohkken logi eanemus lohkkon neahttaášši. Deaddil bajilčállagiid, de beasat lohkat áššiid.

Buot logut leat juovlamánu 21. beaivvi vižžon.

 

 


Per-Ailu Gaup Juuso. Priváhta govva

1. Oainnestii vihtta mehtera allosaš báru boahtime, ovdal go buot čáhpodii …

Boazodolliin leat olu hástalusat ja lihkohisvuođat dulveáigge.

Per-Áilu Gaup Juusos ja su bearrašis ledje leamaš hástalusat beaivvi miehtá, muhto ija guvlui šattai dilli heaggaváralažžan.

Nie álgá min eanemus lohkkon ášši, mas Gaup Juuso muitala dramáhtalaš vásáhusas.

Ášši, man almmuheimmet miessemánu 22. beaivvi, lea lohkkon 2 070 geardde. 

 


Govven: Veterinearainstituhtta

2. Guovttis gildon bargamis bohccui­guin

Geassemánu 18. beaivvi almmuheimmet dán ášši.

Das boahtá ovdan ahte dat guovttis geat leaba Hålogalándda Lágamánnerievttis dubmejuvvon biinnidan bohccuid, verrošan boraspirebuhtadusain ja rievdadan mearkkaid, gildojuvvoba bargamis bohccuiguin.

Ášši lea dássážii lohkkon 1 889 geardde.

 


Govven: Inga Marie Guttorm

3. Gumpe lea báhččon

Dán skápma leat guokte gumppe speadjan sihke sávza- ja boazoealuid. 

Golggotmánu 28. beaivvi báhččui vuosttaš gumpe.

Ášši lea lohkkon 1 842 geardde.

 


Govven: Anne Gro Gaup

4. Politiijat dutka­goahtán jápmima Guovda­geainnus

Geassemánu 2. beaivvi gávdnui nissonolmmoš jápmán muhtin ásodagas Guovdageainnus.

Politiijat dieđihedje iežaset dutkagoahtán ášši, vaikko eai navdán makkárge láhkarihkkuma geavvan jápmima oktavuođas.

Muhtin áiggi maŋŋel dieđihedje politijat dutkama čájehan ahte lei lunddolaš jápmin.

Ášši lea lohkkon 1 550 geardde. 

 


Govven: Inga Marie Guttorm

5. Nubbi gumpe lea báhččon

Skábmamánu loahpageahčen beaggigođii fas ođđa gumpe ihtán Finnmárkkuduoddarii. 

Maiddái dan bivdigohte, ja skábmamánu 29. beaivvi beasaimet almmuhit ahte nubbi gumpe maid lei luottahuvvan.

Gumpeságat leat bivnnuhat min lohkkiid gaskkas, dát ášši lea lohkkon 1 199 geardde.

 


Vuorkágovva: Sárá Máret Rávdná Oskal

6. – In sáhte šat jaska orrut!

Duodji ja gáktegeavaheapmi sáhttá boktit garra dovdduid ja digaštallamiid. 

Dán áššis lea Duodjeinstituhta direktevra Inga Hermansen Hætta, guhte ii loga iežas sáhttit šat jávohaga čohkkát ja oaidnit mo gáktegeavaheapmi ovdána.

– Gávttis oaidná gosa olmmoš gullá. Jus mii dan massit dahje manahit, nu go atnit Kárášjoga gáktái elemeanttaid mat leat Guovdageainnu gávttis, dahje nuppe ládje, dalle šaddá seahki, ii ge dieđe šat gosa mii ge gullá. Jus dan eat hálit, dalle lea olbmuid duohken ja olles Sámi duohken, logai son.

Ášši almmuhuvvui guovvamánu 20. beaivvi ja lea lohkkon 1 154 geardde.

 


Vuorkágovva: Inger Marita Bals

7. Dá leat Sámi Grand Prix 2018 juoigan- ja lávlun­oasse­váldit

Ávvira lohkkit beroštit Sámi stuorámus lávlun- ja juoigangilvvus, Sámi Grand Prixas.

Guovvamánu 27. beaivvi almmuhuvvojedje dán jagi oasseváldit.

Ášši lea lohkkon 1 133 geardde.

 


Vuorkágovva: Inga Marie Guttorm

8. Biebmobearráigeahčču doalaha mearrádusa: Guokte dievddu gildon barga­mis bohccui­guin

Čakčamánu 11. beaivvi almmuheimmet ášši mas bođii ovdan ahte Biebmobearráigeahčču lea loahpalaččat mearridan áššis mas leat gieldán guokte dievddu bargamis bohccuiguin.

Ášši ii sáhte guoddaluvvat.

Dát lei ášši mas lohkkit beroštedje, ja leage lohkkon 1 128 geardde.

 


Govven: Siviilasuodjalus

9. Meahcce­buollin Káráš­jogas: Eai dieđe lea go cahkke­huvvon

Mannan geasi ledje hirbmat báhkat miehtá Sámi, maiddái Kárášjogas Davvi-Sámis. 

Báhkat dagahedje heđiid miehtá, earret eará meahccebuollimiid geažil.

Suoidnemánu loahpas lei ge maid meahccebuollin Kárášjoga gielddas, man buollinčáskadeaddjit ádjánedje máŋga beaivvi čáskadit.

Dát ášši lei bivnnut ja lea lohkkon 1 123 geardde.

 


Govven: Alice Balto

10. Dievdu gávdnui duššan

Miessemánu 2. beaivvi dieđihuvvui muhtin 76-jahkásaš dievdu láhppon Kárášjogas.

Ohcanveagat gávdne su seamma beaivvi, muhto almmái dađi bahábut ii lean šat heakkas.

Ášši lea lohkkon 1 119 geardde.

 

Lassin daidda áššiide mat dán listtus leat, de leat mis leamašan guokte ášši mat leat eanet lohkkon go visot dát. 

Dán jagi leat mii ávvudan Ávvira vuosttaš 10 jagi, ja dan oktavuođas lágideimmet juoigangilvvu. Ášši mas lohkkit besse jienastit luđiid, lohkkui 4 345 geardde. 

Nubbi ášši fas lea «Dán jagi sápmelačča» jienasteapmi mii ain lea rabas, dat lei juovlamánu 21. beaivvi rádjai lohkkon 2 218 geardde.

På forsiden nå