Almmuhus

Almmuhus

Áigot suddjet Jotun­heimen bohcco­bierggu nama

Leat njeallje boazosearvvi Jotunheimen guovllus mat leat ohcan suddjejumi mas lea geográfalaš gullevašvuohta bohccobierggus. Govven: ​​​Lom tamreinlag

– Viimmat bođii ohcan váldit vára ovtta min stuorimus našunála dávviris – bohccobierggus. Dál lei ge áigi, ja dál áigut bargat garrasit nu ahte boazosearvvit Jotunheimenis, Valdresis ja Filfjellas ožžot dan juridihkalaš suoji Norggas maid biebmobuvtta, nu go bohccobiergu, sáhttá oažžut, lohká Matmerk vuođđudusa hálddašeaddji direktevra Nina Sundqvist.

Published date: 
Gaskavahkku, 5 Juovlamánu, 2018 - 15:31
Fáddásánit: 

Njeallje boazosearvvi Jotunheimen guovllus ohcet suodjalusa mii lea geográfalaččat čadnon Jotunheimen guvlui.

Namahus «Jotunheimen Bohccobiergu» lea vuos gaskaboddosaš namma buktagis.

 

Vuosttaš ohcamuš

Lea vuosttaš geardde go ohcet bohccobierggu dohkkehuvvot dan streaŋgámus biebmo- ja juguskvalitehtamearkaortnegii Norggas.

– Bohccobiergu lea fenomenála buvtta, ja ánssáša dan buoremus juridihkalaš suoji mii lea biepmuin. Jotunheimen bohccobierggu mihttu lea olahit seamma árvvu go eurohpalaš dovddus biepmut, nu go serranobiergu, parmabiergu ja Roquefort. Suomas leat jo dohkkehan golbma bohccobuktaga, nu ahte lea áigi ahte mii maid loktet ovdan dan eksohtalaš bierggu. Sávvat ahte dát boktá Finnmárkku ja Plássjeguovllu boazodolliid gilvalanmovtta, go midjiide sáhttá sáddet ain eanet ohcamušaid, lohká Sundqvist movttegit.

 

Dehálaš kvalitehtasteampil

– Min bohccot guhtot Jotunheimen našunálapárkkas ja lagas guovlluin, ja dat njeallje boazosearvvi leat stuora aktevrrat Norgga boazoealáhusas. Mii buvttadit badjelaš 200 tonna bierggu jahkásaččat. Eai leat nu ollugat geat dovdet min ealáhusa ja mii sávvat dohkkehuvvon «suodjaluvvon» namahusain rievdadit dan. Jotunheimen bohccobiergu mii oažžu kvalitehtasteampila bierggu ja mágu ovddas jus lea dakkár suodji duogážis, lohká boazoservviid ovddasteaddji ja ohcamuša prošeaktajođiheaddji Øystein Opdal.

– Guhkit áiggis sávvat Jotunheimen bohccobierggu šaddat bivnnuhis mearkagálvun. Mii áigut geavahit dan dohkkeheami ja mearkka buktaga olggobealde, ovddidit neahttasiiddu, ja rámbuvrras beassat čájáhallat dan gálvvu. Alit haddi ii galgga leat hehttehussan ge – go lea sáhka dan buoremus bierggus maid gávnnat Norggas, lohká Opdal loahpas.

 

Suddjejumi mearkkašupmi

Suddjejuvvon namma lea almmolaš mearkaortnet mii sihkkarastá ahte Norgga biebmoriggodagat ožžot dan suoji ja dohkkeheami maid ánssášit.

Norggas leat 29 biebmo- ja jugusbuktaga main lea suddjejuvvon namma, ja lea njunnošis Nordenis. EU:s leat birrasii 1300 buktaga main lea suddjejuvvon namma ja seamma gáibádusat duođaštit nu movt eatnama, dálkkádaga, árbevieru ja giehtadáidaga.

Mihttu lea stuoridit biebmovalljivuođa ja lasihit buvttadeami guvllolaš ja báikkálaš biebmobuvttadeamis. Gálvomearka galgá sihkkarastit buktaga geográfalaš gullevašvuođa, árbevieruid ja erenoamáš kvalitehtaid.

Lea Biebmobearráigeahčču mii hálddaša mearkaortnega ovttas Matmerkain. Matmerk rávve ja gieđahallá ohcamušaid áššemeannudemiid ja addá evttohusa Biebmobearráigehččui, mii fas loahpas mearrida galgá go ohcamuš dohkkehuvvot. 

Jotunheimen Bohccobiergu vuordá oažžut dan dohkkeheami čakčii 2020.

På forsiden nå