Almmuhus

Almmuhus

Sex ja Politikk almmuha sámegillii seksuála oahpponeavvuid bearrašiid birra 

IEŠGUĐETLÁGAN BEARRAŠAT:  Sex og Politikk bidjá dan jagi «Uke 6» fáddaávdnasiidda fuomášumi dasa, ahte gávdnojit nu ollu earálágan bearrašat go eadni ja áhčči heterofiila bárran. Frank May / NTB scanpix

Arctic Pride olis dat almmuha Sex og Politikk searvi muhtun oasi iežaset seksuála­oahppo­neavvuid «Uke 6»  sáme­gillii. 

Published date: 
Bearjadat, 2 Skábmamánu, 2018 - 12:39
Fáddásánit: 

Dan jagáš fáddán Arctic Prides leat bearrašat, ja danne lea Sex og Politikk lasihan iežaset fáttáide bearrašiid birra ja maiddái jorgalan dan sámegillii.

 

Máŋggalágan bearrašat

Fáddá «Bearrašat» lea heive­huvvon sihke gaskaluohkáide ja nuoraidskuvlla ahkásaččaide, ja guovddážis lea mot bearrašat sáhttet leat iešguđet láhkai. 

– Mii lea bearaš odne? Gávdnojit nu ollu earálágan bearrašat go eadni ja áhčči heterofiila bárran.  Bearrašiid fáddaoassi lea veahkkin geahčestit dárkileappot daid beliid ja veahkkin inkluderet buot mánáid ja nuoraid, seammás go buorebut ipmirdit iešguđetlágan bearrašiid mat gávdnojit, lohká preassadieđáhusas Tor-Hugne Olsen, gii lea Sex og Politikk eaktodáhtolaš searvvi beaivválaš jođiheaddji.

 

– Dehálaš iežas gillii oahppat

Sex og Politikk áŋgiruššá ahte mánáid ja nuoraid oahpahusaide galget gávdnot buorit, searvadahtti, norbmakritihkalaš ja ahkeheivehuvvon gaskaoamit oahpahit ja hupmat mot oažžut buori seksuála dearvvašvuođa. Sin almmuheapmi Uke 6 olis leat ge nuvttá seksueallaoahpponeavvut mat heivehit iešguđet fágaide. 

– Lea dehálaš ahte oahpponeavvut leat iežas gillii, ja dat lea earenoamáš dehálaš go mánát ja nuorat galget oahppat dehálaš fáttáid birra. Danne leat vuoruhan sámegillii jorgalit seksuálaoahpponeavvuid, dadjá Tor-Hugne Olsen gii ieš lea sámi sogálaš. 

 

Almmuheapmi

2017/18 skuvlajagis serve badjel 40 proseantta vuođđoskuvllain Uke 6 fáláldahkii. Evalueren čájeha ahte oahpaheaddjit ledje buore muddui duhtavaččat oahpponeavvuiguin ja Uke 6 váikkuha buorebut skuvllaid seksuálaoahpahusa. 

Uke 6-oahpponeavvut, oktan fáddáávdnasiiguin «Bearrašat» leat nuvttá, ja oahpaheaddjit ožžot daid uke6.no neahttasiiddus. Almmuheapmi lea gaskavahku oassin Arctic Pride čoahkkimis diibmu 19:30 Clarion Hotell the Edges, gos leat fáddán bonju sápmelaččaid vásáhusat.

På forsiden nå