Almmuhus

Almmuhus

Finn­márkkus lea buozalmas­jávkan eane­mus njiedjan

Čájáhusgovva: NTB Scanpix/Gorm Kallestad

5,7 proseantta buozalmasjávkamis 2. kvartála dán jagi lea Finnmárkkus 10,2 proseantta njiedjan seamma kvartála diibmá. Finnmárku lea danne dat fylka riikkas gos lea eanemusat njiedjan doavtterdieđihuvvon buozalmasjávkan dán áigodaga.

Published date: 
Maŋŋebárga, 18 Čakčamánu, 2018 - 15:56
Updated at: 
Ođastuvvon: 18.09.2018 - 16:25
Fáddásánit: 

Buohtastahttojuvvon olles riikkas lea buozalmasjávkan njiedjan 4,1 proseanttain. Aŋkke leat Finnmárkkus ain nubbin eanemus doavtterdieđihuvvon buozalmasjávkan, nu maid Romssas. Dušše Nordlánddas lea alit buozalmasjávkan, 5,8 proseantta. Riikadásis lea buozalmasjávkan dál 5,0 proseantta 2. kvartála dán jagi.

– Lea positiiva go Finnmárkkus lea mearkkašahtti njiedjan buozalmasjávkan dán áigodaga, ja ahte mis lea leamaš bissovaš njiedjan máŋga jagi. Mii áigut ain ovttasbargat bargoaddiiguin, luohttámušolbmuiguin ja buohccindieđiheddjiiguin vai njiedjá vel eambbo, dadjá Finnmárkku NAV Arbeidslivssenter ossodatdirektevra, Dagfinn Gjerde preassadieđáhusas.

 

Buohccedieđáhusat eai biste

57,9 proseantta buohccedieđáhusain Finnmárkkus biste 16 beaivvi dahje unnit. Dat mearkkaša ahte Finnmárkkus leat oanehit buohccedieđáhusdáhpáhusat. 

 

Ahki, sohkabealli ja fidnosuorgi

Buozalmasjávkan Finnmárkkus lea alimus dearvvašvuođa suorggis, 7,7 proseantta. Dat lea njiedjan 10,4 proseanttain dán suorggis buohtastahttojuvvon diimmážiin seamma áiggi. 

 

Buozalmasjávkan nissoniid gaskkas Finnmárkkus lea 7,1 proseantta, ja dievdduid gaska fas 4,4 proseantta. Jus buohtastahttá agi ja buozalmasjávkama, oaidnit Finnmárkkus njiedjama buot ahkejoavkkuin gaskal 30- ja 64-jahkásačča. Buot eanemus njiedjan gaskal 40- ja 44-jahkásaččaid (20,9 proseantta).

 

Buozalmasjávkan ja ássangielda

Kárášjogas lea fylkka alimus buozalmasjávkan, 7,3 proseantta. Unnimus doavtterdieđihuvvon buozalmasjávkan lea Muosáid gielddas, 2,5 proseantta. 

Gávpotgielddain gos eanemus ássit lea buozalmasjávkan ná: Áltá 6 proseantta, Hámmárfeasta 5,7 proseantta, Mátta-Várjjat 5,5 proseantta ja Čáhcesullos 6,5 proseantta.

På forsiden nå