Almmuhus

Almmuhus

Álgo­álbmot­jietna NASCO:s

Sámedikki presideanta Aili Keskitalo. Govven: Sara Beate Eira Persson/Sámediggi

Riikkaidgaskasaš váikkuhanfápmu luondduluosa hálddašeamis šaddá dađistaga čielgaseabbon ja lea dárbu sihkkarastit álgoálbmotjiena riikkaidgaskasaš luossaovttasbarggus NASCO:s, oaivvilda Sámediggi.

Published date: 
Gaskavahkku, 13 Geassemánu, 2018 - 14:35
Fáddásánit: 

North Atlantic Salmon Conservation Organization (NASCO) lea organisašuvdna stáhtaid várás mat hálddašit luondduluosa. Norgga ja Suoma beale sámedikkit leat áidna main lea áicistáhtus NASCO:s dan olis go lea álgoálbmotparlameanta.

Norggas lea Norgga meahcásteddjiid- ja guolásteddjiidsearvvis, Boanddaid searvvis ja WWF:s áicistáhtus.

– Dán jagi sešuvnnas bidjá Sámediggi fuomášumi mearraluossabivdiid dillái go das dađistaga gáržžiduvvojit bivdoáiggit. Mii váldit ovdan gieskat šiehtaduvvon šiehtadusa rájárasttideaddji luossabivddus Deanujogas ja mii váldit ovdan hástalusaid luossabiebmanrusttegiid birra mat lassánit dađistaga ja váikkuhusaid luonddulussii sámi guovlluin, cealká sámediggepresideanta Aili Keskitalo preassadieđáhusastis.

 

Fuolahit ahte álgoálbmotvuoigatvuođat dollojuvvojit

Sámedikki dievasčoahkkin celkkii juo 2012:s ahte lea dárbu heivehit álgoálbmotdimenšuvnna riikkaidgaskasaš luossaovttasbarggus NASCO:s. Sámediggi ozai ja oaččui áicistáhtusa NASCO:s seamma jagi ja lei vuosttaš gearddi ovddastuvvon áicin 2013:s.

Dán jagáš sešuvdna lea geassemánu 12.-15. beaivve Portlandas, Maines, USA:s.

– Sámedikki bargun lea fuolahit ahte álgoálbmotvuoigatvuođat dollojuvvojit ja ahte sámi beroštumit deattuhuvvojit sihke regulerenbarggus dáppe ruovttus ja go Norga ovttasdoaibmá eará stáhtaiguin hálddašanáššiin, dadjá Aili Keskitalo.

 

 

Háliidit ahte NASCO dohkkeha árbedieđuid

NASCO ovttasbarggu bokte bidjet bealit láidestusaid movt luossaresursa galgá hálddašuvvot. Dát guoská álgoálbmogiidda geain lea luossabivdu oassin sin ávnnaslaš kulturvuođus.

Sámediggeráđđi háliida ahte álgoálbmotoaidnu galgá ollu eanet leat oidnosis riikkaidgaskasaš proseassain.

– Mii háliidat bidjat fokusa dasa ahte álgoálbmotoaidnu oainnusmahttojuvvo NASCO:s. Mii háliidat ahte NASCO dohkkeha árbedieđuid ja árvvus atná álgoálbmogiid vuoigatvuođaid luondduluosa hálddašeamis, dadjá sámediggepresideanta Aili Keskitalo.

På forsiden nå