Almmuhus

Almmuhus

Ollugat eai dovdda ortnega movt mánáid­gárde­mávssu unnidit

Čájáhusgovva: Colourbox

Vuoliduvvon mánáidgárdehaddi bearrašiidda geain lea unnán sisaboahtu dahká ahte eambbogat besset leat mánáidgárddiin. Ođđa raporttas boahtá ovdan movt sáhttet eambbogiid olahit dieđuiguin.

Published date: 
Gaskavahkku, 16 Miessemánu, 2018 - 13:34
Fáddásánit: 

Badjelaš 33 000 máná ovddas ožžo vuoliduvvon váhnenmávssu mánáidgárddis 2016:s, dan ákkas go lea unnán dienas ruovttus. Dat lea lassáneapmi 8000 mánáin jagi das ovdal. 

Badjel 18 000 máná ožžo 20 diimmu nuvttá áiggi mánáidgárddis dan seamma sivas, mii lea maid lassáneapmi 2015 rájes.

 

Loktejit dienasráji

Dutkanraporttas, man servvodatdutkama instituhtta (ISF) lea almmuhan, boahtá ovdan ahte suohkanat ja váhnemat váldet bures vuostá ortnega. Ortnet lea nu ahte váhnemat eai galgga máksit mánáidgárdesaji ovddas eanet go 6 proseantta dietnasis. Haddi unnu das mađi unnit dienas lea.

Borgemánu 1. beaivvi rájes loktana dienasrádji 533 500 ruvdnui. Jus dine vuollel dan supmi, de sáhttá ohcat nuvttá váldoáiggi mánáidgárddis.

 

Eambbogiid olahit

ISF dutkit Håkon Solbu Trætteberg ja Hilde Lidén leaba čállán raportta mas boahtá ovdan ahte leat ollugat geat eai dovdda dán ortnega ja nu eai dieđe sin rievtti birra.

Dál namuhuvvojit vuogit mat sáhttet veahkehit olbmuid váldit atnui ortnega. 

– Dál fertejit váhnemat sáddet ohcamuša jus áigot leat mielde ortnegis. Jus váldá eret ohcamušoasi, de soitet eambbogat geavahišgoahtit dán ortnega, lohká Trætteberg preassadieđáhusas.

På forsiden nå