Almmuhus

Almmuhus

FeFo ruoná doarjagiin ceggejit rabas barttaid olbmuide

RUONÁ DOARJAGAT: FeFo lei ožžon 143 ruoná doarjjaohcama go áigemearri dievai. Dain ožžo 53 ohcama  doarjaga. Oktiibuot lei giđa juolludeapmi 873 000 ruvnno. Stuorimus vuoruheapmi lea cegget rabas barttaid tuvravázziide dán geasi. Govven: Eirik Palm

Rabas barttat olbmuide geat leat tuvrras lea okta doaibmabidju mii lea ožžon Ruoná doarjaga dan giđa. 375 000 ruvnno lea juolluduvvon hukset rabas barttaid.

Published date: 
Gaskavahkku, 16 Miessemánu, 2018 - 14:49
Fáddásánit: 

​– Mii oaččuimet olles 143 ohcama oktiibuot 6,3 miljovnna ruvnno ovddas. Dán jagi leat mii lasihan Ruoná doarjagiid obbalaš supmi 1,2 miljovnna ruvdnui, ja dál leat mii addán stuorámus eaŋkildoarjaga mii goassege lea addon, lohká kommunikašuvnna ja servodatoktavuođa jođiheaddji, Eirik Palm preassadieđáhusas. 

Son oaivvilda tuvrabálggisprošeavtta Sállana rastá (Sørøya på langs) masa juolluduvvui olles 375 000 ruvnno hukset rabas bartta tuvravázziide.

 

Giktalit olbmuid miehtá riikka

Leat Ákŋoluovtta ja Hámmárfeastta gielddat mat leat soahpan ovttasbarggu merket oktilis tuvrabálgá Norgga njealját stuorámus sullos.

Geinnodat lea dihkáduvvon ovttas boazoealáhusain, lea sullii 100 kilomehtera guhku, ja manná Fuglenis Márregobis Tarhalsenii davvioarjjabealde Áhkkárvuona. Dáppe galget huksejuvvot golbma tuvrabartta, mat galget leat rabas finadeddjiide geasset ja dálvet.

Leat Norgga árktalaš universitehta studeanttat geat leat merken dan ja dat lea dahkkon Norgga turistasearvvi standárddaid mielde. Vurdojuvvojit gitta 2000 tuvravázzi juohke jagi.

– Dat prošeakta boahtá oallugiidda buorrin, ja mii váikkuha sihke loaktimii ja álbmotdearvvašvuhtii. Dasa lassin lea midjiide deaŧalaš ahte ruđas maid mii geavahit leat váikkuhusat. Mii sávvat dát sáhttá šaddat fitnanmihttomearrin olbmuide miehtá riikka, ja mii lea positiivvalaš báikkálaš ealáhusaide, dadjá direktevra Jan Olli preassadieđáhusas.

 

Ovdánahttit olgodaddama

Prošeakta álggahuvvui diimmá geassemánu ja plána lea loahpahit dan borgemánus dán jagi.

Dat golbma tuvrabartta galget huksejuvvot Finnmárkku beziin, ja geasset galget sajit čielggaduvvot. 2019:s galget dat leat leat rahpasat almmolaš geavahussii.

– Ulbmil prošeavttain lea ovdánahttit olgodaddama rittus mearkagálvun ja identitehtan gielddaide ja sajáiduhttit dan ássanhálu, loaktima, dearvvašvuođa ja mátkkoštanealáhusa strategiijan. Lea stuorra beroštupmi prošektii, ja mis leat juo leamaš olu olbmot geat leat váldán oktavuođa, miehtá riikka, geat háliidit fitnat doppe geasset, lohká Tom Eirik Ness, gii lea Sállana rastá (Sørøya på langs) prošeavtta prošeaktajođiheaddji.

FeFos leat olu rabas tuvrabarttat Finnmárkkus maid beassá geavahit friddja ja vásáhusat dáppe leat ahte lea ortnet maid olbmot atnet árvvus. Danne lei maiddái ovttamielalaš stivra mii dohkkehii mearrádusevttohusa doarjut Sállana rastá prošeavtta.

 

Bivnnuhis ortnet

Eirik Palm Go stivra mearridii juovlamánus diibmá lasihit Ruoná doarjagiid, mearriduvvui maiddái ahte stivra galgá meannudit ohcamiid maidda evttohuvvo juolludit badjel 50 000 ruvnno.

Nubbi stuorra ohcan, man stivra gieđahalai, lei doarjja Finnmárkku olgolastinráđđái (Finnmark friluftsråd). Maiddái dat ohcan dohkkehuvvui ovttajienalaččat.

– Mii leat ilus go Ruoná doarjagat leat bivnnuhat. Leat leamaš olu ohcamat, ja nu go diibmá, de leat mii earret eará vuoruhan ohcamiid guovlluin mat leat ožžon unnán doarjagiid ovddeš jagiid, lohká Eirik Palm doarjjaortnega giđa juolludanvuoru birra.

 

11 miljovnna 11 jagis

2007 rájes lea FeFo juolludan badjel 11 miljovnna doarjjaortnega bokte. Ulbmil lea leamaš aktivitehta, loaktin ja álbmotdearvvašvuohta.

Ruoná doarjja galgá leat vuollegisceahkkefálaldat eaktodáhtolaš servviide ja ovttastusaide, muhto sáhttit vuoruhit maiddái eará ohcciid jus devdet gáibádusa ahte leat rabas álbmogii ja ahte doarjja lea illun oallugiidda.

 

Gávnnat visot juolludemiid FeFo siiddus.

På forsiden nå