Almmuhus

Almmuhus

Muohta­čorgenbiila badjel luotta

BADJEL LUOTTA: Muohtačorgenbiila vujii disdaga iđida badjel luotta Silisávžžis. Govven: Sárá Máret Rávdná Oskal

Dálki mii lea bistán miehtá beassážiid, ain bistá miehtá Finnmárkku. Ain lea olu luottaid alde ráidovuodjin, ja Stáda geaidnodoaimmahat ballá eambbo luottaid šaddat giddet dálkki geažil.

Published date: 
Maŋŋebárga, 3 Cuoŋománu, 2018 - 14:58
Updated at: 
Ođastuvvon: 04.04.2018 - 09:16
Fáddásánit: 

Disdaga iđida ledje olu biillat mat šadde Silisávžžis gaskal Suolovuomi ja Áltta vuordit guhká, go muohtačorgenbiila lei doarrás vuodján.

Dál lea luodda fas rahppon maŋŋel go muohtačorgenbiila giddii luotta disdaga iđida.

Ii leat sihkar mii lea dagahan ahte muohtačorgenbiila vujii badjel luotta, muhto soaitá njalka siivu mii lea dagahan dan.

 

Heajos vuodjinsiivu miehtá fylkka

Miehtá Finnmárkku lea dál stuora uđasvárra, njalka luottat ja garra biegga mii dagaha váttis vuodjindili olbmuide.

Oktiibuot logi luottas lea ráidovuodjin, ja golbma luotta leat giddejuvvon.

Stáda geaidnodoaimmahat vároha ahte soitet ain eambbo luottat giddanit dálkki geažil, ja ávžžuhit olbmuid čuovvut mielde sin neahttasiidduin makkár dilli dat lea luottaid alde.

– Mii ávžžuhit dieđus olbmuid vuodjit várrogasat ja čuovvut mielde min neahttasiidduin mo dilli lea luottaid alde. Vaikko mannan vahkkoloahpas orui nu ahte dálki ložže, de lea aŋkke vearáskan fas. Leat olu luottat gos lea ráidovuodjin juste dál, ja mii ballat ahte soitet vel eambbo giddejuvvot dálkki geažil, dieđiha Stáda geaidnodoaimmahat Ávvirii.    

 

Ain dálkkáska

Váikko orui nu ahte dálki soaitii ložžet, de dieđiha Vervarslinga i Nord-Norge baicce dál orru nuppe lahkai.

Dálki vearáska, ja ihttá beaivvi mielde oččot olbmot Finnmárkkus vuordit olu šlahti dahje borgga.

Eandalii nuorta Finnmárkkus lea vurdojuvvon gitta 30cm ođđa muohttaga muhttin sajiin ihttin.  

Muđui Finnmárkkus vurdet garra biekka, muohttaga ja čavga riđu. 

– Olbmot fertejit atnit muittus ahte garra dálki sáhttá dagahit váddáseabbun vánddardit, sihke meahcis ja luottaid alde. Danne mii ávžžuhit olbmuid vánddardit várrogasat ja čuovvut mielde sihke dálkki ja vuodjindili luottaid alde.

 

Geahča dás makkár dilli lea iešguđet luottaid alde.

 

 

 

På forsiden nå