Almmuhus

Almmuhus

FeFo váldá Unjárgga-duomu čuovvoleapmái

– Vuosttamužžan leat mii duhtavaččat go viimmat oažžut čielggadeami, dadjá FeFo-direktevra Jan Olli. Dá lea son šiehtadallamiin Aimusrievttis ođđajagimánus 2018. Govva: Eirik Palm

FeFo-direktevra lei duhtavaš čielggademiin, ja sávvá ahte Alimusrievtti duopmu buvttiha ráfi Finnmárkku riektediliide, dieđiha FeFo preassadieđáhusastis.

Published date: 
Bearjadat, 9 Njukčamánu, 2018 - 10:28
Updated at: 
Ođastuvvon: 09.03.2018 - 12:09
Fáddásánit: 

Bearjadaga njukčamánu 9. lei duopmu válmmas: Alimusriekti nanne ahte FeFo ain galgá eaiggáduššat eatnamiid ja luondduvalljodagaid nággoguovllus Unjárggas fylkka ássiid bealis.

 

Prinsihpalaččat mávssolaš

– Dat lea ášši mii lea mávssolaš bargovugiide viidáseappot. Danne lei mávssolaš midjiide geahččalit meahcceduopmostuolu konklušuvnna Alimusrievttis. Vuosttamužžan leat mii duhtavaččat go viimmat oažžut čielggadeami. Duopmu buktá láidestemiid, maid mii sávvat jaskkodahttit riektediliid Finnmárkkus, dadjá direktevra Jan Olli preassadieđáhusas.

FeFo válljii guoddalit meahcceduopmostuolu duomu mii celkui ođđajagimánu 23. beaivvi 2017, mas Unjárgga ássit ožžo earenoamáš (eksklusiiva) rievtti bivdit guliid, bivdit, ja lubmet areálas mii lea sullii 400 kvadráhtakilomehtera.

 

Alimusriekti lea gávnnahan ahte Unjárgga gilisearvi ii leat rábidan earenoamáš (eksklusiiva) rievtti meahccevalljodagaide áigeguovdilis guovllus, muhto ahte sis leat iešheanalaš geavahanvuoigatvuođat mat leat áimmahuššon Finnmárkkulága olis, čuožžu FeFo preassadieđáhusas.

 

Báikki olbmuin leat vuoigatvuođat

Olli lei Alimusrievttis go duopmu celkui, bearjadaga.

Finnmárkkukommišuvnna jagi 2013 rapporttas konkluderejuvvui ahte báikegotti olbmuin leat iešheanalaš-, muhto eai sierranas (eksklusiiva) geavahanvuoigatvuođat nággoguovllus. Dat geatnegahttá FeFo.

– Finnmárkkukommišuvnna konklušuvdna ahte báikegotti olbmuin leat rábiduvvon vuoigatvuođat meahccái, lea nanus. FeFo:s lea stuorra ovddasvástádus čuovvolit ja operationaliseret (doibmiibidjat) dan. Dat šaddá stuorra ja deaŧalaš bargu ovddosguvlui. Mii áigut joatkit buori ja lagas ovttasbarggu giliservviiguin ja earáiguin geat ásset Finnmárkkus, lohká Jan Olli.

 

Buvttiha ráfi riektediliide

Unjárgga-ášši lea meannuduvvon dievasčoahkkináššin (plenumáššin) Alimusrievttis. Dasa lassin go ášši lea prinsihpalaččat mávssolaš ja buktá láidestemiid, lea FeFo oaidnu leamaš ahte Alimusrievtti mearrádus nanne boahtte áiggi hálddašeaddji legitimitehta, gii ihkinassii dál šattaš. Dasa lassin buvttiha dat ráfi Finnmárkku riektediliide.

– Oažžut ráfi riektedilliid dáfus lea leamaš deaŧalaš midjiide, ja mii áigut leat veahkkin dasa. Mii váldit Alimusrievtti duomu čuovvoleapmái. Mii áigut dál lohkat duomu dárkilit, ja dárkilit geahččat sisdoalu, dadjá FeFo-direktevra loahpas preassadieđáhusas.

På forsiden nå