Almmuhus

Almmuhus

Vuoruhit vuođđo­ealáhusaid politihkalaččat

Sámediggeráđđelahttu Silje Karine Muotka. Vuorkágovva

Sámediggeráđđi bidjá vuođđoealáhusaid politihkalaš áššelistui ja bovde dan oktavuođas boahtte vahku vuođđoealáhusseminárii go Sámedikkis lea dievasčoahkkin.

Published date: 
Gaskavahkku, 28 Guovvamánu, 2018 - 15:04
Fáddásánit: 

– Seminára áigumuššan lea vuosttažettiin addit Sámedikki áirasiidda áddejumi Sámedikki politihkas vuođđoealáhusaid, eanadoalu, boazodoalu, meahcceealáhusa ja luossabivddu siskkobealde, Mearrasámi strategiijat meannuduvvojedje vuđolaččat juovlamánu 2017 dievasčoahkkimis, ja dan geažil ii leat fáddán dán semináras. Earáide, geain leat vuođđoealáhusberoštumit, sávvat maiddái váimmolaččat buresboahtima searvat, dadjá sámediggeráđđi Silje Karine Muotka preassadieđáhusastis.

 

Doibmet go mihttomearit?

Seminára čađamanni fáddá leat makkár vásihusat Sámedikkis leat iešguđege dieđáhusain maid dievasčoahkkin lea mearridan, ja doibmet go mihttomearit váikkuhangaskaomiid geavaheamis áigumuša mielde ja deaivat go daiguin olahusjoavkku buori vuogi mielde.

– Seminára namma lea «Vuođđoealáhusat biebmobuvttadeaddjin» danne go mii háliidat bidjat stuorát fokusa biebmoárvoháhkama vejolašvuođaide sámi guovlluin, ja biepmu han mii buohkat dárbbašit, dadjá politihkalaš ráđđeaddi Anne Toril Eriksen Balto.

 

Sámi kultuvra ja giella

Baltos lea semináras sáhkavuorru eanet biebmobuvttadeami vejolašvuođa birra Sámis.

Vuođđoealáhusat leat dehálaš  biebmobuvttadeaddjit ja lea árvoháhkki mii sihkkarastá ássama distrivttain ja sámi guovlluin, oaivvilda Sámediggi.

– Ealli gilit dáhkidit buoremusat dan ahte sámi kultuvra ja giella ožžot sihkkaris boahtteáiggi. Sámedikki bealis oaidnit mii stuorra vejolašvuođaid árktalaš guovlluid biebmobuktagiin, erenoamážit go jurddašit kvalitehta ja sierra mearkagálvvu mas berret atnit buoret ávkki, dadjá Anne Toril Eriksen Balto.

Dievasčoahkkimis galgá meannuduvvot cealkámuš eanadoallošiehtadallamiidda, ja ráđđi sávvá oažžut buori digaštallama das makkár hástalusat ealáhusas leat ovddabealde ja makkár vejolašvuođat gávdnojit.

Sámediggeráđđái lea deaŧalaš oažžut nana ja gilvalangievra eanadoalu sámi guovlluin, mii mearkkaša dan ahte addit stuorát buvttadandoarjaga unnit doaluide ja ahte searvefitnut bisuhuvvojit.

På forsiden nå