Almmuhus

Almmuhus

Sámediggi háliida deattuhit árktalaš biebmo­buvttadeami

Silje Karine Muotka (Foto: Åse M.P. Pulk/Sámediggi)

Jorgalahttin dihte heajos ahtanuššama eanandoalus, mas earret eará heaittihuvvojit doalut, de háliida Sámediggi nannet dáláš váikkuhangaskaomiid eanadoallošiehtadusas.

Published date: 
Bearjadat, 16 Guovvamánu, 2018 - 15:02
Fáddásánit: 

– Mii oaidnit stuorra vejolašvuođaid árktalaš guovlluid buktagiin, erenoamážit go jurddašit kvalitehta ja iežas mearkagálvvu. Árktalaš buktagat leat njálgábut, erenoamážit ruotnasat, lábbábiergu ja árktalaš ja sámi guovlluid eará biergu, main lea kvalitehta dáfus buorre ovdamunni, dadjá sámediggeráđđi Silje Karine Muotka Sámedikki preassadieđáhusas.

 

Gilvalanvejolašvuohta eanadoalus

Sámediggái lea deaŧalaš oažžut nana ja gilvalanvejolaš eanadoalu sámi guovlluin. Dát mearkkaša stuorát buvttadandoarjaga unnimus doaluide ja ahte ovttasdoaibmanfitnodagat bisuhuvvojit.

Deaivvadettiin ealáhusain lea Sámediggi ožžon deaŧalaš árvalusaid dálkkádat ja guvllolaš hástalusaid birra, mat gávdnojit árktalaš guovlluin, cealká Sámediggi preassadieđáhusas.

– Okta ovdamearka lea dat go šibitdoavttergolut leat hui sakka divron sámi guovlluin, gos šibitdoaktáriin leat guhkes gaskkat. Danne háliidat mii fokuseret dan dán jagi eanadoallošiehtadallamiin, dadjá Muotka.

 

Eanet nannet báikkálaš biebmobuvttadeami

Ovdal lávii Sámediggi oažžut guokte miljon ruvnnu oassin eanadoallošiehtadusas, árktalaš eanadoalu áŋgiruššamii, muhto dat loahpahuvvui ovddit áigodagas.

Jus Sámediggi oččošii dáid ruđaid ruovttoluotta, de sáhtášii Sámediggi ain eanet nannet báikkálaš biebmobuvttadeami sámi guovlluin.

 – Midjiide lea deaŧalaš ahte eanadoalus leat buorit rámmaeavttut sihke doibmii ja ahtanuššamii. Eanadoallu lea deaŧalaš biebmobuvttadeaddji ja árvoháhkan mii sihkkarastá ássama boaittobeale guovlluin ja sámi guovlluin. Ealli gilit dáhkidit buoremusat dan, ahte sámi kultuvra ja giella oažžu sihkkaris boahtteáiggi, dadjá Muotka. Son ii doarjjo ráđđehusa oainnu das, ahte stuorrabuvttadeamit vuoruhuvvojit ovddabeallai boaittobeale báikkiid, danne go dat guovddáštahttá eanadoallobuvttadeami Norggas. 

 

Stuorát váikkuhanvejolašvuođat

– Hui deaŧalaš lea ahte Sámediggi oažžu dađistaga stuorát váikkuhanvejolašvuođa eanadoallopolitihkas. Sámediggeráđđi áigu ovddidit ášši cealkámuša birra eanadoallošiehtadallamiidda Sámedikki dievasčoahkkimii, dadjá Muotka.

På forsiden nå