Almmuhus

Almmuhus

Leaba dovddastan ahte leaba vearre­dahkkit Álttá-rievideamis

Čájáhusgovva: Heiko Junge/ NTB Scanpix

Nieidda guovttos geat leigga várohuvvon rievidan kioska Álttás mannan sotnabeaivve, leaba dovddastan.

Published date: 
Bearjadat, 16 Guovvamánu, 2018 - 16:16
Updated at: 
Ođastuvvon: 16.02.2018 - 16:17
Fáddásánit: 

Guokte 20-jahkásaš nieidda leaba váldon gitta go leaba rievidan Álttá kioska, čállá iFinnmark.

Soai leaba dovddastan vearredaguid, muitalii Álttá leansmánnebálvá Sven Tore Nilsen.

 

Eaba gula rievidanbirrasii

Bearjadaga diibmu 12:s lei politiijain preassakonferánsa Álttá leansmánnevisttis Narvesen kioskka rievideame birra. Doppe bođii ovdan ahte guokte nuorra nieidda leaba dovddastan daguid.

Politiijat deattuhit ahte nieiddat eai gula makkárge rievidanbirrasii, muhto leaba ovddežis oahppásat politiijaide.

Nieidda guovttos ássaba Álttás.

– Soai leigga gárrenmirkkuid návddašan go dán dagu dagaiga, dadjá Nilsen.

 

Goappašagat beassan giddagasas

Nubbi váldui giddagassii gaskavahku ja nubbi fas duorastaga.

Goappašagat leaba beassan luovus dál, Nilsen ii loga dárbbu doalahit sudno šat giddagasas.

Politiijat leat vearjjuid gávdnan ja duoguštan daid.

 

Bivdet olbmuid garvit geavaheames nieiddaguoktá namaid sosiála mediain

Mediaid bokte lea čallon ahte lei báhčin rievideame oktavuođas. Dán ii loga Nilsen geavvan.

Son maid sihtá olbmuid várrugasat sosiála mediain kommenteret sudno birra.

– Dát lea okta dain stuorámus dramáhtalaš dáhpáhusain mii lea geavvan Álttás máŋgga jahkái, dadjá Nilsen.

Duorastaga beaivit dieđihedje politiijat Twitteris ahte guokte nieidda leaba váldon giddagassii rievideame oktavuođas.

Kioskka rievideapmi lei mannan sotnabeaivvi Álttás. Váruhuvvui árrat ahte ledje guokte nuorra nieidda mat dahke vearredagu.

Guovttis, geat leigga gokčan ámadajuid, bođiiga kioskii sotnabeaivvi diibmu 21.30 ja bággiiga bargiid addit ruđaid ja gálvvuid sudnuide.

Álttá politiijat atnet dáhpáhusa duođalažžan ja bivdet buohkaid dieđihit sidjiide jus leat oaidnán maidege mii sáhttá áššái guoskat.

 

 

 

På forsiden nå