Almmuhus

Almmuhus

Láhppon čuoigi gávdnui heakkas

Čuoigi gávdnui dearvan, muhto lei galbmon go heahteveahkit gávdne su disdatija Fielbmálágu báikkis Álttás. Govven: Kari Lisbeth Hermansen.

Diibmu 05:35 dieđihii Finnmárkku ohcanveahka (LRS) ahte skuterveahka lei ožžon láhppon čuoigi eret báikkis gosa lei láhppon.

Published date: 
Maŋŋebárga, 16 Ođđajagimánu, 2018 - 09:25
Fáddásánit: 

Lei garra dálki guovllus mii dagahii ohcama váttisin, dieđiha Davvi-Norgga Váldogádjunguovddáš (HRS NN).

 

Deaddelii heahteboalu

Lei 25-jahkásaš dievdu gii lei čuoigame Áhkkánjárggas Áltái, ja lei bijadan juovlamánu 15. beaivvi mátkái. Sus lei rusttet mainna son sáddii dađistaga GPS-dieđu vai su lagamuččat oidnet gos son lea. Sus lei maid heahteboallu mielde, mainna sáhtii dieđihit guđe posišuvnnas son lea jus bártašuvvá.

Lei mánnodatiđit, ovdal diibmu 07:00, go váldogádjunguovddáš oaččui dieđu SPOT fitnodagas ahte muhtin norgalaš lea deaddelan heahteboalu mii addá signála Fielbmálágu báikkis, Álttá orjješlulábealde.

Bođii diehtu makkár posišuvnnas dievdu lea ja mii su namma lea.

 

Loga maid: – Mii diehtit juste gos mii galgat ohcat

 

Boaganvovdnaráidu

Lei garra dálki mánnodaga, ja biegga bosui garrasit ja guolddustii. Sihke Sea King ja vuosttaš skuterráidu fertii vuollánit ja jorggihit Eaiboávžái.

Dan rájes geahččaledje guokte boaganvovnna beassat báikái, ja politiijat, Ruovttusuodjalus ja Rukses Ruossa nagodedje beassat lagabui, ja ledje sullii 10 km eret láhppon olbmás.

Politiijaid skuterráidu čuovui boaganvovdnaráiddu, muhto eahkedis jorggihedje molsut bargiid.

 

Lei galbmon go gávdnui

Diibmu 01 áigge ložžegođii biegga, ja ohcanveahka geahččalii ođđasit beassat láhppon dievddu lusa.

Láhppon dievdu lei galbmon go gávdne su, muhto lei dihtomielalaš ja vuoibmi lei badjáneame go beasai lieggasii. Suodjalusa boaganvovdna doalvvui olbmá ambulánsii mii lei vuordime dan láhppon olbmá, dieđiha váldogádjunguovddáš.

iFinnmark čállá maid ahte gádjunveahka ii dieđe gosa dat guokte beatnaga leat šaddan, muhto jáhkket ahte dievddu lagamuččat áigot ohcagoahtit beatnagiid beaivvi mielde.

På forsiden nå