NANA POLITIHKALAŠ ÁŊGIRUŠŠAN: Silje Karine Muotka muitala Sámedikkis lea ásaheami rájes 1989 leamaš nana politihkalaš áŋgiruššan mearrasámi guovlluid ektui. Govven: Inger Marita Bals

Mearrasámi ealáhus­strategiijat meannu­duvvojit dievas­čoahkkimis

Sihkkarastin dihtii ealasis rittu, ovddida sámediggeráđđi Sámedikki mearrasámi ealáhusstrategiijaid meannudeapmái, Sámedikki dievasčoahkkimii juovlamánus.

14:24 Skábmamánu 24. beaivi 2017

– Báikegottit ja olbmot geat orrot rittus galget sáhttit oažžut birgejumi dain resurssain mat leat lagaš guovllus ja háhkat eallinfámolaš báikegottiid, gos olbmot háliidit ássat, dadjá sámediggeráđđi Silje Karine Muotka preassadieđáhusas.

Son muitala Sámedikkis lea ásaheami rájes 1989 leamaš nana politihkalaš áŋgiruššan mearrasámi guovlluid ektui.

– Ođasmuvvi ja ceavzinnávccalaš luondduvuđot ealáhusat leat vuođđun, ja mis leat čielga áigumušat ain eallit ja viežžat birgejumi dán guovllus, ollu sohkabuolvvaid ovddas guvlui, dadjá Muotka. Strategiijat leat politihkalaš dokumeanta, mas leat guovddáš bealit, movt Sámediggi sáhttá bargat vejolašvuođaid ektui ja sihkkarastit boahtteáiggi riddui ja nie maid mearrasámi kultuvrra.

 

Galgá dienas

Sámediggeráđđi oaivvilda ahte vuoigat­vuođat ja bivdoearit fertejit leat nu stuorrát, ahte álbmot mearrasámi guovlluin sáhttet oažžut dohkálaš dietnasa bivddus.

– Mearrasámi vuoigatvuođaid dohkkeheapmi lága bokte lea bajimuš oassi sámiid árbevirolaš birgejumi ain bisuheamis. Vuotnabivdolávdegoddi, mii nammaduvvui 2014:s, lea buorre mielde hálddašaninstánsa. Šállošahtti lea dattetge dat go lávdegoddi dán rádjái ii leat ožžon dohkálaš doaibmabušeahta, ahte dat sáhtášii ollašuhttit bargamušaid mat das leat mandáhta vuođul, dadjá Muotka.

Sámediggeráđi oaivila mielde galggašedje fylkapolitihkkarat, geat leat jurddašišgoahtán doaimmaid guovloođastus ektui, ahte sihke Sámediggi ja vuotnabivdolávegoddi leat dakkár orgánat main sáhtášii leat rolla sakka nanosmahttojuvvon regionála guolástushálddašeamis.

Fáddásánit
Ođđasat

På forsiden nå