Čájáhusgovva: Heiko Junge/NTB scanpix

Mannan ija dáhpá­husat

Dát dáhpáhuvai dan botta go don ođđet.

09:41 Skábmamánu 25. beaivi 2017

Finnmárkku politiijaguovllus dieđihit leamašan moadde dáhpáhusa lávvardaga čuovganeapmái, eanaš dain ledje doarrumat.

Álttás šadde árraeahket jo bissehit doarrumiid, go diibmu 21.40 bearjadateahket ožžo dieđu ahte muhtimat ledje doarrán muhtin hotealla olggobealde gávpotguovddážis.

– Okta olmmoš váldui gitta doarrumiid geažil, ja go lei badjelmeare gárihuvvan, čállet politiijat.

 

Doarrumat

Politiijat čállet twitteris ahte diibmu 01.01 mannan ija ožžo dieđu ahte Báhcavuonas ledje muhtimat doarrán.

– Go politiijat jovde de lei jaskkodan. Guovttis gohččojuvvo guođđit báikki, čállet politiijat lávvardat iđida.

 

Muđuid čállet politiijat vel ahte leat váidán ovtta olbmo Báhcavuonas gean navdet geavahan narkotihka.

 

Álttás fas doarrumat

Dál iđđes dieđihit politiijat ahte diibmu 01.05 ožžo dieđu ahte Álttá gávpotguovddážis maid ledje soapmásat doarrán.

– Okta váldui gitta go ii jeagadan politiijaid gohččuma, čállet twitteris.

 

Várggáin riedja

Diibmu 03.16 ožžo politiijat fas dieđu doarrumii birra, dán háve Várggáin ges.

Doppe ledje maid jaskkodan ovdal go politiijat jovde báikái.

 

Váldui gitta

Beal guđas iđđes šadde ges politiijat váldit gitta muhtima Bossegohpis, go olmmoš galgá leamaš badjelmeare gárremin ja viggan diggostallat.

 

Muđuid čállet politiijat ahte sii dán vahkkoloahpa atnet šleđggongeavaheami guovddážis Mátta-Várjjagis.

Fáddásánit
Ođđasat

På forsiden nå