EAMBBO LIHKOHISVUOĐAT: Odne lea stuora gávppašanbeaivi, čáhppes bearjadat. Logut čájehit ahte dan beaivvi lassánit biilalihkohisvuođat. Buhtadusfitnodat rávve olbmuid vuodjit várrogasat. Čájáhusgovva: Colourbox

Čáhppes bearjadaga eambbo biila­lihkohis­vuođat

Odne berre vuodjit várrogasat, go čáhppes bearjadaga dáhpáhuvvet eambbo lihkohisvuođat go dábálaččat.

11:01 Skábmamánu 24. beaivi 2017
Ođastuvvon: 24.11.2017 - 12:57

Čáhppes bearjadat lea márkanbeaivi mii lea boahtán Amerihkás Norgii. Lea šaddan stuora gávppašanbeaivin, ja rámbuvrrat ja giehmánnit fállet buriid hattiid. Olusat álggahit juovlagávppašeami dán beaivvi.

Statistihkka čájeha ahte eambbo lihkohisvuođat dáhpáhuvvet odne gaskal 12:00 ja 18:00, dieđiha Tryg Forsikring preassadieđáhusas.

– Diibmá lei oláhus go sullii diibmu njealjis ledje unnimusat 99 biilalihkohisvuođa diibmui. Statistihkka čájeha ahte gaskal 50- ja 64-jahkásaš dievddut leat vearrámusat. Odne berre nissonolbmuid diktit vuodjit. Ledje 73 proseantta eambbo lihkohisvuođat main dievdu lei vuoddji, lohká Torbjørn Brandeggen Tryg Forsikring buhtadusfitnodagas.

 

Ale doama

Eanemus leat lihkohisvuođat main dušše okta biila lea oassin. Nubbin eanemus lea go biila vuodjá nuppi njeaiga. Vaikke makkár agiid geahččá, de leat dievddut dávjjimusat vuodján go lihkohisvuohta lea dáhpáhuvvan.

Eanaš lihkohisvuođat leat maid stuora gávpogiin. Muhto leat maid lihkohisvuođat smávit báikkiin.

– Maŋŋelgaskabeaivvi ja huššaáiggis leat erenoamáš olu biillat jođus. Huššaluvvan vuoddjit dagahit stuorát vára. Mii ávžžuhit olbmuid várret buori áiggi gávppašeapmái odne, lohká Brandeggen.

På forsiden nå