Porokello applikašuvdna skiliha telefuvnnas jus leat bohccot lahkosis. Šearbmagovva: porokello.fi.

Appa dieđiha jus leat bohccot luodda­guoras

Suomas leat ráhkadan applikašuvnna mobiltelefuvnnaide mainna sáhttá dieđihit earáide dahje oažžut dieđu jus leat bohccot luoddaguoras. Dalle skiliha biellu telefuvnnas.

14:57 Skábmamánu 07. beaivi 2017
Ođastuvvon: 07.11.2017 - 14:58

Lea Independent Barents Observer mii muitala Porokello birra. Appa gávnnat Google Play gávppis, App Store gávppis ja muhtin ođđamállet navigašuvdnavuogádagain.

Go lea dieđiheapmi telefuvnnas alde, de oažžu dieđu jus bohccot leat das luotta lahkosis go lea vuodjime.

 

Dieđit earáide

Lea Lapland Centre of Economical Development mii lea ráhkadan appa, ja sii sáddejit biellojiena du telefuvdnii go lahkonat báikki gos bohccot leat.

Applikašuvdna doaibmá nu ahte jus muhtin lea vuodjime ja oaidná bohccuid luoddaguoras dahje luotta alde, de son deaddela boalu appas mainna fas dieđiha earáide geain lea appa.

De skiliha sin telefuvnnas biellojietna, ja diehtu lea doaimmas diimmu. Vuoddjit fertejit dieđihit go leat bohccot luotta alde, mii veahkeha earáid fuomášit bohccuid.

 

Dušše Suomas vuos

Appa lea ožžon fuomášumi ja oaččui dán jagi johtolatsihkarvuođa bálkkašumi Suomas.

Dat gávdno vuos dušše Suomas, muhto leat geahčadeame sáhttá go Davvi-Norggas ja Davvi-Ruoŧas váldit atnui dán appa, čállá Independent Barents Observer.

Fáddásánit
Ođđasat

På forsiden nå